Sargasso-see

Die Sargasso-see, ‘n noordelike deel van die Atlantiese Oseaan, is die enigste see in die wêreld sonder ‘n kuslyn.

Sargasso-see
Kaart van die Sargasso-see
Koördinate:	28°N 66°W
Soort:	See van die Atlantiese Oseaan

Ligging

Die see word omring deur ‘n viertal groot oseaanstrome: aan die westekant die Golfstroom, noord die Noord-Atlantiese dryfstroom, oos die Kanariese stroom en suid die Noord-Atlantiese ekwatoriale stroom. Omdat die seestrome aanhoudend in sterkte en stroomrigting effens verander, is presiese grense van hierdie see nie vas te pen nie. Uiterste grense is waarskynlik 20º tot 35º noord en 30º tot 75º wes. Die see is oos van Bermuda en Florida en oorvleuel met die Bermuda-driehoek.

Afmetings

Die see is langwerpig met afmetings van nagenoeg 1100 km by 3200 km. Afhangende van die aard van die omringende seestrome op daardie tydstip kan dit ‘n opppervlakte van ‘n 5 miljoen km² bereik. Dit is amper so groot as die Middellandse See (2½ milj. Km²) en die Karibiese See (2¾ milj. km²) saam. Die seediepte wissel tussen die 5000 en 7000 m. Weens die middelpuntvliedende krag van die groot seestrome om hierdie see is die wateroppervlakte in die middel van die see ongeveer ‘n meter laer as van die omringende Atlantiese Oseaan.

Seelewe

Seker die opvallendste kenmerk van hierdie see is die massas bruinwier. Die see is redelik kalm met swak stroming, die soutgehalte is hoog en die water helder. Die gebied kry ‘n lae reënval, ligte winde en het ‘n hoë verdampingsgraad. Daar is min plankton in die see en dit lei tot ‘n beperkte seelewe. Garnale, krappe, alge, wurms en die wit marlyn (Kajikia albida) kom voor. Dit is ‘n groot broeigebied vir sekere palingspesies.

Naam

Na bewering het Columbus hierdie see ontdek. Onder die matrose van die seilskepe het die see altyd ‘n slegte naam gehad. Hulle was bang hul skepe val in die massa seewier vas en hulle kom dan daar om. Die 15de eeuse Portugese matrose het die Portugese woord vir ‘n druiwekorrel, nl. sargąo, aan die see gegee, want die lugblasies aan die wier het vir hulle soos druiwekorrels voorgekom. In ou Nederlandse geskrifte het die see ook as die Wiersee bekend gestaan.

Besoedeling

Seevaarders het vanaf 1972 begin opmerk dat daar in die see ‘n groot hoeveelheid swerfafval, veral plastiek, in die see ronddryf. Nou is dit een van die aardbol se mees besoedelde seë.

Bibliografie

• oceanservice.noaa.gov/facts/sargassosea.html
• researchgate.net/figure/Sargasso-Sea-Ocean-currents-Sargassum-movement-and-coast-invasion-in-red_fig2_358444510
• sargassoseacommission.org/sargasso-sea
• wonderopolis.org/wonder/where-is-the-sargasso-sea