![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/8/80/Riehentor-aquarelle-18401850.jpg/640px-Riehentor-aquarelle-18401850.jpg&w=640&q=50)
S Riechedoor
From Wikipedia, the free encyclopedia
S Riechedoor (au "Riechemerthor") isch en ehemoligs Stadtdoor vo dr Stadt Basel und emol Bestandteil vo dr Basler Stadtmuure gsi. Es isch näben em Bläsidoor s zweite Stadtdoor im Chleibasel gsi.
![Thumb image](http://upload.wikimedia.org/wikipedia/commons/thumb/8/80/Riehentor-aquarelle-18401850.jpg/640px-Riehentor-aquarelle-18401850.jpg)
Dialäkt: Baseldütsch |
![Thumb image](http://upload.wikimedia.org/wikipedia/commons/thumb/8/88/Merian_Basel_1642.jpg/640px-Merian_Basel_1642.jpg)
S Riechedoor isch 1265, e baar Johr spöter as s Bläsidoor, urkundlig erwähnt worde. Es het au s «oobere Door» gheisse, s St. Theodorsdoor oder s Heiligchrüzdoor, noch em Heilige Chrüz vor em Door, wo mä 1403 drnäbe d Eländchrüzkapälle baut het.[1] Noch em Isteiner Chrieg het mä Steiblöck vo dr gschleifte Isteiner Burg brucht, zum s Door usbaue. Bis zur Basler Reformation isch usse nooche e Bild vom Johannes und dr Maria ufghänggt gsi, wo dr Doorwächter iine gnoh het, wenn s Wätter schlächt gsi isch. Sit mindestens 1443 hets vor em Grabe e Vorwärk gha, im 17. Johrhundert het mä non e Schanze drzue do.[2]
1840 isch s Door no umbaut worde. Mä het s Dach über em Vorwärk abgrisse, en Uhr, die ersti im obere Chleibasel, iibaut und dr Zinnechranz mit eme Stuefegiibel ersetzt.[2]
Es het näbem Spaaledoor as schönsts Basler Door gulte, isch aber fümf Johr noch dr Verabschiidig vom Basler Stadterwiiterigsgsetz vo 1859, im Juni 1864, doch abgrisse worde.