Sozialdarwinismus
e Theorii und Ideologii, wo sich uf e psöidowüsseschaftlige, biologistische Determinismus gstützt het / From Wikipedia, the free encyclopedia
Sozialdarwinismus säit men ere Räije vo politische Ideologie, wo in Groosbritannie, Nordamerika und Westöiropa in de 1870er Joor ufchoo si und e psöidowüsseschaftlige biologistische Determinismus verdrätte häi. Si si bis zum Erste Wältchrieg seer populär gsi.[1]
Dr Sozialdarwinismus het sich ursprünglig as e wüsseschaftligi Theorii verstande, wo gwüssi Aspäkt vom Darwinismus uf die menschlige Gsellschafte aagwändet und eso zrächtbooge het, ass er deren iiri Entwigglig as Folg vo dr natürlige Selekzioon bim „Kampf um d Existänz“ het chönne erklääre.[2][3] Die underschiidlige Spiilarte vom Sozialdarwinismus häi noch em Franz M. Wuketits die drei göiiche Kärnussaage:[4]
- Im Darwin si Theorii vo dr Uslääsi isch in sozialer, ökonomischer und au moralischer Hiisicht maassgääblig für die menschligi Entwigglig.
- Es git guets und schlächts Erbmaterial.
- Gueti Erbaalaage sötte gförderet, schlächti usglöscht wärde.
Vom Aafang vom 20. Joorhundert aa het sich dr Sozialdarwinismus mee und mee radikalisiert und sich mit dr Eugenik und mit Rassetheorie vermischt. Sozialdarwinistischi Ideä häi schliesslig e groosse Iifluss uf die nazionalsozialistischi „Rassehügiene“ gha.