Anthropomorphismus

Dr Begriff Anthropomorfismus (griech. ἄνϑρωπος / anthropos: „Mensch“ und μορφή / morphē: „Form, Gstalt“) bezäichnet das, wemm mä menschligi Äigeschafte uf Dier, Götter, Natuurgwalte und Äänligs überdräit, d. h. wemm mä sä duet vermenschlige. Die menschlige Äigenschafte chönne sich drbii in dr Gstalt oder au im Verhalte zäige.

Die retorischi Figur vo dr Anthropomorfisierig häisst Personifikazioon oder Prosopopoiia.

Anthropomorfi Götter

Anthropomorfi Darstellig vo dr Venus (Venus vo Arles, 1. Jh. v. Chr.)

Anthropomorfismus git s in dr christlige, hinduistische, germaanische, griechische, keltische und römische Mythologii, wo d Götter usgsproche menschlig usgseen, au wenn si zum Däil in bsundrige Situazioone au e zoomorphi Gstalt chönne aanee. In dr altägyptische Religioon häi die mäiste Götter e menschligi und e dierischi Gstalt. Noch em Alte Testamänt het dr Gott vo de Hebräer au menschligi Äigeschafte und Gfüül.

E Hufe Atheiste und Agnostiker dänke, ass d Vorstellig vo Gott in de hütige Wältreligioone (Hinduismus, Judentum, Christentum und Islam) öbbe genauso anthropomorf sig wie die in dr Antike. Do drzue sääge d Muslime, ass äini vo de Äigeschafte vo Allah sig, ass män en mit nüt chönn vergliiche^[1].