Chymosin

Chymosin (au Rennin; vo griechisch χυμός chymos ‚Flüssigkäit’)^[1] isch en Aspartat-Endopeptidase (Protease). S Rinder-Chymosin findet mä als Labenzüüm im vierte Mage (Labmage) vo Chälber, wo s Milchäiwiss, bsundrigs s Casein, denaturiert und eso hilft, si z verdaue. S Chymosin wird in dr Form vom Vorlöiferprotein PreProChymosin synthetisiert. Das cha dur aminoterminali Abspaltig vo Peptid zum ProChymosin, PseudoChymosin und schliesslig in die aktivi Enzüümform Chymosin umgwandlet wärde.

Industriell wird Chymosin brucht zum Chääs härzstelle. Früener het mä s as Labfermänt us Chälbermääge gsammlet, sit de 1990er Joor wird s au gentechnisch härgstellt.^[2]