Daniel Keel

Dr Daniel Keel (* 10. Oktober 1930 z Äisele; † 13. Septämber 2011 z Züri) isch e Schwyzer Verleger gsii. Ä isch Grinder un bis zue sym Dod aktive Laiter vum Diogenes Verlag gsii.

dr Daniel Keel (1999)

Lääbe

Dr Keel het s Gimnasium abbroche un het Buechhändler glehrt. Er het 1952 dr Diogenes Verlag grindet, aafangs as Ai-Mann-Unternäme. Anne 1954 isch sy Jugedfrynd Rudolf C. Bettschart zum Unternäme dezue gstoße. Dr Diogenes Verlag isch aafangs e Cartoon-Verlag gsii, dr erscht Titel isch e Band vum Ängländer Ronald Searle gsii. S Buech isch unter em Titel Weil noch das Lämpchen glüht erschine.

Anne 1962 het er d Moleri Anna Diekmann (1940–2010) ghyrote. Dr jinger Suhn, Philipp (* 1968), isch 2012 dr Verleger vu Diogenes wore, dr elter, Jakob, hockt zäme mit em Bettschart em Verwaltigsrot vum Verlag vor. Em Daniel Keel sy Brueder Othmar Keel isch Theolog, Bibel- un Religionswisseschaftler un Egyptolog.^[1]

Dr Diogenes Verlag het unter em Keel e Hufe wichtigi Autore verlait, wie z. B. dr Friedrich Dürrenmatt, dr Georges Simenon un au ne Hufe änglischsprochigi Krimiautore wie dr Dashiell Hammett un d Patricia Highsmith. Dr Verlag isch bis hit uf iber 200 Millione verchaufti Biecher un fascht 6000 verlaiti Titel chuu, wu iber 2000 allno liferbar sin.

Uuszaichnige

• 2011: Friedrich-Perthes-Medallie vum Berseverain vum Dytsche Buechhandel fir dr Keel un sy Compagnon Rudolf C. Bettschart «für ihr grosses Engagement».
• 2011: Ritter vum Ordre des Arts et des Lettres^[2].

Weblink

• Martin Ebel: Daniel Keel gestorben. Der Mann, der Loriot und Dürrenmatt entdeckte. Welt Online, 13. Septämber 2011, abgruefen am 2. Jänner 2012.
• Felicitas von Lovenberg: Zum Tod von Daniel Keel. Alles, nur nicht langweilig. FAZ.net, 13. Septämber 2011, abgruefen am 2. Jänner 2012.
• Hans-Jost Weyandt: Zum Tode Daniel Keels. Mit Diogenes vom Dürri zur Dörrie. Spiegel Online, 13. Septämber 2011, abgruefen am 2. Jänner 2012.
• Daniel Keel, Gründer des Diogenes-Verlages, ist 80-jährig gestorben