Endo Anaconda

Dr Endo Anaconda (aigetli Andreas Flückiger; * 6. Septämber 1955 z Bùùrdlef; † 1. Februar 2022^[1]) isch e Schwyzer Singer-Songwriter un Schriftsteller gsii. S Pseudonim Endo het er gwehlt, wel Ändu, e bärndütschi Churzform vu Andreas, usserhalb vum Bärndütsch nit iberall verstande woren isch. Mer en vor allem as Sänger vu dr Bärner Dialäkt-Band Stiller Has gchännt.

dr Endo Anaconda (2009)

Lääbe

Dr Endo Anaconda isch as Suhn vun ere eschtrychische Mueter vu Kärnten un eme Schyzer Vater uf d Wält chuu. Ase chlai isch er zerscht z Biu ufgwagse. As Fimfjehrige het er sy Vater verlore, e Bolizischt, wu där bi me Autouufall verunglickt isch. Mit zwelf Johr isch er in e Internat uf Klagenfurt gschickt wore; speter isch sy Familie au dert anne zoge. Z Wien het er e Lehr gmacht as Siibdrucker.

In dr frieje 1980er-Johr isch dr Endo Anaconda in d Schwyz retuurchuu un het in verschidene Bärner Musikgruppe gspiilt, unter anderem bi Caduta Massi un dr Alpinisten. Anne 1989 het er zäme mit em Balts Nill d Band Stiller Has grindet un het mit ihm zäme di erscht MC mit em Titel Stiller Has uusebrocht. Ab 2002 isch d Banbd as Trio ufdrätte mit em Gitarrischt René «Schifer» Schafer, wu bis dert as Gaschtmusiker mitgmacht ghaa het, ab 2005 het si d Zämesetzig vu dr Band e baarmol gänderet. Insgsamt het Stiller Has elf Studioalbe un drei Live-Albe vereffetligt.

dr Endo Anaconda mit Stiller Has, 2009

Dr Endo Anaconda het regelmäßig Kolumne in dr Bärner Zytig unter em Pseudonym Bärbeisser un fir d Coopzytig gschribe. Anne 2005 isch en Uuswahl vu syne Bärbeisser-Kolumne unter em Titel Sofareisen im Ammann Verlag uusechuu; dodermit isch er fascht e halb Johr lang uf Blatz 1 vu dr Schwyzer Buechbestsellerlischt gsii. Ab 2007 het er au fir s Magazin Faces gschribe.^[2] Dr Anaconda het drei Chinder mit drei Fraue ghaa, isch syter 2018 Wuchenufenthalter z Erlischbach gsii un het sunscht in dr Ämmetaler Gmai Trub gläbt.^[3]

Em Endo Anaconda sy erscht Bihnestuck «Auspacken» isch am 6. Merz 2010 am Luzerner Theater urufgfiert wore.^[4]

Bolitischi Haltig un bolitisch Engaschmänt

Au bolitisch isch dr Endo Anaconda aktiv gsii.^[5] Är het si unter andere fir d Initiative Grundeinkommen engaschiert.^[6][7]

Biecher

• Hasentexte. Mit Fotos von Francesca Pfeffer und Liner Notes von Urban Gwerder. Limmat, Zürich 1999, ISBN 3-85791-332-0
• Sofareisen. Ausgewählte und kommentierte Kolumnen 2001–2005. Ammann, Zürich 2005, ISBN 3-250-60082-2
• Walterfahren. Kolumnen 2007–2010. Secession, Zürich 2011, ISBN 978-3-905951-11-0

Weblink

 Commons: Endo Anaconda – Sammlig vo Multimediadateie

• dr Endo Anaconda uf dr Websyte vu Stiller Has
• Publikatione vo und über Endo Anaconda im Katalog Helveticat vo dr Schwiizerische Nationalbibliothek
• Endo Anaconda, Sänger: «Ich hänge am Leben». Gspräch mit em Dominic Dillier in dr Sändig Focus uf Radio SRF 3 vum 24. Februar 2020, 59 Min.
• Stars extra: Endo Anaconda im Gspräch mit dr Sandra Studer, Sändig vum Schwyzer Färnseh vum 31. Jänner 2010
• Schweizer Bestseller. Portrait im Deutschlandfunk vum 8. Merz 2006