Eva Grebel

D Eva Katharina Grebel (* 1966 z Dierdorf) isch e dytschi Aschtronoomi. Si isch Brofässeri am Aschtronoomische Räche-Inschtitut, aim vu dr Dailinschtitut vum Zäntrum fir Aschtronomy vu dr Uniwersiteet Haidelberch.

d Eva Grebel

Lääbe

D Eva Grebel het ire Stuudium in Fisik un Aschtronomy an dr Uniwersiteet Bonn anne 1991 mit em Diploom abgschlosse un isch im nämlige Joor as Summerstudänti am Space Telescope Science Institute z Baltimore gsii. In ire Zyt as Dokterandi an dr Uniwersiteet Bonn isch si vu 1992 bis 1994 zwai Joor as Student Fellow am La-Silla-Observatorium vu dr Europäische Siidstäärnwaart gsii. Anne 1995 het si zum Teema „Stellar population studies in nearby galaxies“ z Bonn bromewiert.^[1][2][3]

No Poschtdokterandene-Stelle an dr University of Illinois at Urbana-Champaign (1995–1996), dr Uniwersiteet Würzburg (1996–1997) un dr University of California, Santa Cruz (1997–1998) isch d Grebel vu 1998 bis 2000 mit ere Hubble-Fellowship an d University of Washington z Seattle gange.^[1][2]

Im Aaschluss an e Stell as Foorschigsgruppelaiteri (C3) am Max-Planck-Inschtitut fir Aschtronomy z Haidelberch ab 2000 het d Grebel 2003 e Ruef as Brofässeri fir beobachtendi Aschtronomy an s Aschtronoomisch Inschtitut vu dr Uniwersiteet Baasel iiberchuu, wu si vu 2004 bis 2007 au as Diräkteri voorgstanden isch.^[1][2]

Anne 2007 isch d Grebel eme Ruef as Brofässeri fir Aschtronomy an d Uniwersiteet Haidelberch noogange, wu si Diräkteri vum Aschtronomische Räche-Inschtitut am Zäntrum fir Aschtronomy vu dr Uniwersiteet Haidelberch wooren isch.^[1][2] D Grebel isch des Zyt di ainzig ooredli Brofässeri fir Aschtronomy z Dytschland gsii.^[4]

D Grebel isch Sprächeri vum DFG-Sunderfoorschigsberaich 881 „Das Milchstraßensystem“ an dr Uniwersiteet Haidelberch gsii^[5] un Bresidänti vu dr Kummissioon H1 „The Local Universe“ vu r Internazionaale Aschtronoomische Unioon.^[6]

Foorschig

D Eva Grebel foorscht zue dr Stäärn in unsere Milchstrooß un dr andere Mitgliider vu dr Lokaale Gruppe vu dr Galaxie mit dr Grooße un dr Chlaine Magellansche Wulke und r nooche Zwäärggalaxie. S Wisse zue dr cheemische Ewoluzioon un zue dr Galaxiestruktuur, zum Entstoo vu dr Stäärn un zue dr Aigeschafte vu verschiidene Stäärnpopulazioone bruucht si fir Ruggschliss uf d Ewoluzioon un s Entstoo vu dr Milchstrooß un vu Galaxie im Allgmaine.^[7][6][8]

Uuszaichnige, Bryys un Eerige

• 1996: Ludwig-Biermann-Feerderbryys vu dr Aschtronoomische Gsellschaft^[9]
• 1999: Chrétien International Research Grant vu dr American Astronomical Society^[10]
• 2006: Johann-Wempe-Bryys vum Aschtrofisikaalische Inschtitut Potsdam^[7]
• 2009: Lautenschläger-Foorschigsbryys^[11]
• 2011: Vollmitgliid vu dr Haidelbercher Akademy vu dr Wisseschafte^[12]
• 2015: Hector Wisseschaftsbryys^[13]
• 2021: Ufnaam as Mitgliid in d Leopoldina in dr Sekzioon Fisik^[14]

Weblink

• Websyte vu dr Eva Grebel bim Aschtronoomische Räche-Inschtitut, Haidelberch