Heinrich Zimmermann (Entdeckungsreisender)

Dr Heinrich Zimmermann (* 17. Oktober 1741 z Wiesloch; † 3. Mai 1805 z Starnberg) isch bi dr letschte Räis vom James Cook drbii gsi.

Dr Heinrich Zimmermann, Gmäld vom Johann Georg Edlinger

Dr Zimmermann het Gürtler gleert und isch scho jung us siner kurpfälzische Häimet drvo. Er isch zerst uf Gämf, denn uf Lyon und spööter uf Bariis. Im Joor 1776 isch er uf London und isch Matroos uf em Cook sim Schiff worde, wo d Nordwestpassaasche vo Asie uf Öiropa het welle go sueche.

Die änglischi Admiralidäät het s zwar verbote, aber dr Zimmermann het äinwääg uf dr Räis Notize gmacht. 1781 isch er wider z Dütschland gsi und het s Buech Heinrich Zimmermanns von Wissloch in der Pfalz, Reise um die Welt, mit Capitain Cook veröffentligt. Das het Erfolg ghaa und dr Kurfürst Karl Theodor het dr Zimmermann zum „Churfürstliche Liibschiffmäister“ ernennt.

Im Joor 1787 het dr Zimmermann e zwäijöörigi Räis uf Ostasie gmacht, und isch z China und z Bengale gsi.^[1]