Henry Dunant

Dr Henry Dunant (* 8. Mai 1828 z Gämf; † 30. Oktober 1910 z Heide), Daufname Jean-Henri Dunant,^[1] isch e Schwiizer Gschäftsmaa und e Humanist vo christliger Brägig gsi.

Dr Henry Dunant in spötere Johr, gnaui Datierig unbekannt

Läbe und Wirke

Während ere Gschäftsreis het er im Juni 1859 in dr Nöchi vo dr italiänische Stadt Solferino die schrecklige Zueständ under de Verwundete noch ere Schlacht zwüsche dr östriichische und dr französische Armee gseh. Über sini Erläbniss het er e Buech mit em Ditel Eine Erinnerung an Solferino gschriibe und das 1862 uf eigeni Chöste veröffentligt und in Europa verdeilt. E Johr spöter isch z Gämf s Internationale Komitee vo de Hilfsgsellschafte für d Verwundetepfläg gründet worde, wo sit 1876 dr Name Internationales Komitee vom Roten Kreuz (IKRK) het. D Gämfer Konvention, wo 1864 beschlosse worden isch, goht im Wäsentlige uf d Vorschleg us em Dunant siim Buech zrugg. Dr Henry Dunant, wo gschäftligi Broblem übercho het und wägen e us dr Gämfer Gsellschaft usgschlosse worden isch und denn drei Johrzähnt lang in Armuet und Vergässeheit gläbt het, gältet wäge däm as dr Begründer vo dr Internationale Rotchrüz- und Rothalbmond-Bewegig.

Im Johr 1901 het er für sini Läbensleistig zsämme mit em französische Pazifist Frédéric Passy dr erst Friidensnobelbriis überchoo.