Nasenspiegel

Dr Naasespiegel (Rhinarium) isch e Beriich, wo von ere Schliimhut um d Naaselöcher vo vile Süügerarte bildet wird und vor allem bi Makrosmate vorchunnt, also bi Dier mit eme guet entwicklete Gruchssinn.^[1] Typisch für e Naasespiegel isch, ass käini Hoor druf waggse, ass d Oberflechi in Fälder iidailt isch und as es es vili Drüese und Dastkörperli druf het.^[2] Aber bim Moschusochs und e baar andere Arte het s Hoor uf em Naasespiegel.^[1]

Dr Nasespiegel von ere Huuschatz

Hüfig isch dr Naasespiegel uf e Beriich um d Naaselöcher beschränkt, bsunders bi Raubdier und Paarhuefer. Mänggisch ghört au d Oberlippe drzue und denn het mä e Nase-Lippe-Spiegel, wie s Flotzmuul vo de Rinder und d Rüsselschiibe vo de Säu. Über s Philtrum cha dr Naasespiegel mit dr Schliimhuut vom Muulvorhof verbunde si.^[2]

Under de Primate si s d Füechtnasenaffe, won e Nasespiegel hai. Die verchürzti Schnauze vo de Drochenasenaffe het drgege kei Nasespiegel, so dass deren ihri Oberlippe, wo nit underbrochen isch und Hoor druf wachse, e hochi Differenzierig vo dr mimische Muskulatur vom Muul möglig macht.^[2]