Ravi Shankar

Dr Ravi Shankar (Bengalisch: রবি শংকর; Rabi Śaṃkar; * 7. April 1920 z Varanasi; † 11. Dezämber 2012 z San Diego; bürgerlige Naame Robindro Shaunkor Chowdhury) isch en indische Musiker und Komponist gsi, wo uf em Zupfinstrumänt Sitar gspiilt het.^[1] Dr Hans Neuhoff het en in Die Musik in Geschichte und Gegenwart as dr bekanntist zitgenössisch indisch Musiker bezäichnet.^[2]

Dr Shankar im Merz 2009 z Delhi

Lääbe und Wärk

Dr Shankar isch in sinere Jugend in dr Danzgrubbe vo sim Brueder Uday Shankar in Europa und Indie uf Tuur gange. 1938 het er ufghöört mit Danze und het under em Hoofmusiker Allauddin Khan aagfange, d Sitar leere. 1944 isch er mit dr Leer fertig gsi und denn het er as Komponist afo schaffe. Er het zum Bischbil d Muusig für d Apu-Trilogii vom Satyajit Ray gschriibe. Vo 1949 bis 1956 het er as Muusigdiräkter vom All India Radio Neu-Delhi gschafft.

Im Joor 1956 het er aagfange, Konzärtturneä in Öiropa und Amerika z mache und s Aasee vo dr klassische indische Muusig isch in de 1960er Jooren dur Leere, Ufdritt und Kontakt zum Violinist Yehudi Menuhin und zum George Harrison vo de Beatles gwaggse. Dr Shankar het sich mit dr westlige Muusig abgee und het Instrumentalkonzärt für Sitar und Orchester gschriibe. In de 1970er und 1980er Joor isch er uf Turnee in dr ganze Wält gsii. Er isch bis churz vor sim Dood ufdräte, vilmol mit sinere Dochder Anoushka.

Uszäichnige

Vo 1986 bis 1992 isch er zum Mitgliid vom Rajya Sabha, em Oberhuus vom indische Parlamänt, ernennt worde. Dr Shankar isch 1999 mit em höggste zivile Orde vo Indie, em Bharat Ratna, uszäichnet worde, und er het drei Grammy Awards überchoo.

Bibliografii

• Ravi Shankar: My Music, My Life. Hrsg.: Simon & Schuster. 1968, ISBN 0-671-20113-1.
• Ravi Shankar: Learning Indian Music: A Systematic Approach. Hrsg.: Onomatopoeia. 1979, OCLC 21376688.
• Ravi Shankar: Raga Mala: The Autobiography of Ravi Shankar. Hrsg.: Genesis Publications. 1997, ISBN 0-904351-46-7.

Weblingg

 Commons: Ravi Shankar – Sammlig vo Multimediadateie

• Ravi Shankar bi Allmusic (änglisch)
• Ravi Shankar in de Internet Movie Database (änglisch)