Semiten

As Semite wärde vor allem historischi Völker bezäichnet, wo e semitischi Sprooch schwätze oder gschwätzt häi.

D Häärkumft vom Begriff

Dr dütsch Historiker August Ludwig von Schlözer het dr Begriff 1781 brägt und sich drbii uf d Völkerdaafele in Genesis bezooge. D Bible het d Abstammig vom Abraham uf e Sem, äine vo de Söön vom Noach, zrugg. Vo do isch s chii, ass mä in dr biblische Zit alli Völker im Nooche Oste, wo sich as Noochkomme vom Abraham gsee häi, as „Söön vom Sem“.

Noch däm ghööre zu de Semite d Amhare, Tigrinya, Araber, Hyksos, Malteser, Minäer, Sabäer, Amoriter, Ammoniter, Akkader/Babylonier/Assyrer/Aramäer, Hebräer, Kanaaniter, Moabiter, Nabatäer, Phönizier und Samaritaner.

D Semite im sproochwüsseschaftlige Sinn

D Verbräitig vo de semitische Sprooche

D Semite im sproochwüsseschaftlige Sinn si aber nid idäntisch mit de Noochkomme vom Sem in dr Bible. So häi d Kanaaniter zwar e semitischi Sprooch gschwätzt, dr biblisch Stammvater Kanaan wird aber as Soon vom Ham, em andere Soon vom Noah, beschriibe.

Hütigi Völker, wo semitischi Sprooche schwätze, si z. B. d Araber, d Hebräer, d Aramäer und d Malteser. Dr Sammelbegriff „Semite“ wird aber eender in Bezug uf die historische Völker verwändet.

Semite as rassistische Begriff

In verschiidene psöidowüsseschaftlige Rassetheorie, wo vo dr Wüsseschaft as unwüsseschaftlig abgleent wärde, si d Juude as „Semite“ bezäichnet worde, wil d Hebräer e semitischs Volk sige. Zum dr Juudefindligkäit e „wüsseschaftligi“ Basis z gee, si d Semite zun ere „minderwärtige Rasse“ erkläärt worde, wo nid imstand sig, en äigeständigi Kultur z entwiggle. Vo do isch d Bezäichnig Antisemitismus choo, wil d Juudefind sich sälber as Antisemite bezäichmet häi.

Dä Artikel basiert uff ere fräie Übersetzig vum Artikel „Semiten“ vu de dütsche Wikipedia. E Liste vu de Autore un Versione isch do z finde.