Sindelfingen

Geografie

Sendlfenga leid ausorhalb vom Nordoschdrand vom Obera Gae, am Fuas vom Glemswald zwischa dor Schwippe, dui må em Schdaddgebid ãfangd, ond-m Sommerhofabach. Dor haechsde Punkt leid uff 532, dor diafschde ufff 409 m i. NN. S´ Schdaddgebid sälber gåd vo 425 bis 460 m i. NN. Zom Nordschwarzwald brauchd-s a halba, zor Schwäbischa Alb a gnabba Schdond.

Klima

Emm-a normala Jår geid-s ogfär 735 mm Räaga. Där Wärd leid em middlora Driddl vo de ibliche deitsche Mässwärd. Am droggnedschda isch dor Januar, am maeschda Räaga geid-s em Juni.

Schdedd ond Flägga dromrom

An Sendlfenga grenzed (em Uhrzaegor nåch, em Oschda ãgfanga): Stuagert (Stadtgraes), Laefelda-Echderdenga (Landgraes Esslenga) ond Beblenga, Ehnenga, Åedlenga, Grafenao, Magstadt ond Leoberg (älle Landgraes Beblenga).

Schdaddgliederong

Sendlfenga sezzd sich zsẽma aus dor Kärnschdadd ond de Schdadddåel Måechenga (Maichingen) ond Darmsa (Darmsheim), dia må em Rãma vo dor Gebietsreform 1971 aeglidored wårda send. Dia båede Schdadddåel send haed Ortschafta em Senn vo dor bada-wirttabärgische Gmaendeordnong mid ma Ortschaftsråt, där må bei jedora Kommunalwahl nui gweld wird, ond mid ma åegena Ortsvorsteher. Seid-m Januar 2008 endschdåd uff dor graosa Fleche vom friora Beblengor Flugblatz dor nuie Schdadddåel Flugfeld, a Vorhaba zsẽma mid Beblenga.

Uff dor Gemarkong vo dor Kärnschdadd send en de ledschde Jårzehnd Wohngebiet mit zum Dåel åegene Nãma endschdanda. Då dorza ghaered zom Beischbiel Viehweide, Pfarrwiesen, Spitzholz, Eschenried, Eichholz, Hinterweil ond Goldberg.

Raomblanong

Sendlfend bilded zsẽma mid dor Nåchberschdadd Beblenge a Middelzentrum en dor Regio Stuagert. Stuagert isch´s Oberzäntrum. Zom Middlbereich Beblenge/Sendlfenga ghaered Aidlenge, Altdorf, Ẽhnenga, Gärdrenga, Grafenao, Hildrizhausa, Holzgerlenga, Magstadt, Scheeåech, Sdoenabronn, Waldabuach ond Weil.

Aegmaendonga

1. September 1971: Darmsa
1. Dezember 1971: Maechenga

Was es so alles geit

S´ Wichdiggschde zom gugga isch d´ romanischa Martinskirch, wo von der Aldschdadd aus ganz oba aufm Buggel schdåd. Vor der Kirch schdåd a moderna Skulptur vom St. Martin, wia er sein Mandl doilt. Oemål em Jår geid-s ao on Martinsritt. D´ Kirch selber isch 1083 gweiht worda ond isch noch italienischem Vorbild baud worda, drom hot se da Durm näabadra schdanda, da Zwischaraum hend se erscht schpäder zuabaut. Heit isch se evangelisch. Ennadrenn isch se zemlich oifach aufbaud, aber grad dees macht se so scharmand. S´ geit dord efters mol a schene Musik, dia hend a oiges Streichorcheschter ond a baar Cheer ond sonscht no guete Leit.

En der Aldschdadd ka mor no an Haufa Fachwerg ãgugga ond´s alde Rothaus, dees må se zu ma Museeum omfunktioniert hend. Oberhalb vom Margdblatz schdåd´s middlere Rothaus, des isch ao a Museeum mit Gemälde. Dord isch ao der Kartaverkauf fir Veranschdaldonga ond d´ Tourisdainformatio. D´ Zebrastroefa a baar Meder weider send aus Carrara-Marmor. S´ nuie Rothaus isch ed weit dorvo, aber des isch a blosor Funktionsbau.

Enduschdri

En Sendlfenga isch der Daimler, midd mae wia 30.000 Arbeitsbläzz. S´ Werg selber isch ogfähr so graoß wia d´ Aldschdadd. Ond au dromrom geits an Haufa Enduschdri ond Logischtig vo Firmena, dia må ihre Sacha an dor Daimler liefered. Dees gild au fir Beblenga, bsonders auf der Hulb, wo dor Daimler ao no Sacha broduziert, außorhalb vo saem Haubtgelände. Manche Leid holet sich ihr Audo dort selber em Werg ab ond mached no a Werksfiehrung. Sae nuis Audo hold mor am „Magic Point“, wo ãgeblich äbbes Magisches bassird, wenn mor de Audokaefer dor Schlissl en d´ Hand druggd.

Remove ads

Bolitik

Birgermåeschdor

A Schultheiss vom Flägga Sendlfenga wird anna 1255 gnennt, 1271 a Schultheiss vo dor Schdadd. Seid 1280 håd-s on Vogt gäa, där må bis anna 1605 z´ Beblenge saen Sitz gheed hådd. Nå isch Sendlfenga vom Amt Beblenge drennt wårda, und nå hend Amtmanna bzw. Oberamtmanna d´ Schaddvorwaldong glaeded.

Vo 1819 ã hådd s´ Schdaddoberhaupt d Bezeichnong „Schdaddschulteß“ draga ond vo 1930 ã Birgermåeschdor. Seid dor Erhebong zor Graosa Graesschdadd am 1. Februar 1962 håesd-or Oberbirgormåeschdor.

Schdaddoberhaipter seid 1819

1819–1826: Johann Friedrich Dinkelacker
1826–1832: Johann Breuning
1832–1849: Christian Immanuel Conz
1850–1895: Johann Gottfried Frank
1895–1932: Wilhelm Hörmann
1932–1945: Karl Pfitzer
1945–1946: Werner Häring
1946–1977: Arthur Gruber
1977–1993: Dieter Burger
1993–2001: Joachim Rücker
Seid 2001: Bernd Vöhringer

Wahla

Ergäbnis vo de Landdagswahla seid 2006:

Johr	CDU	Griene	SPD	FDP	Linke¹	AfD	Sonschtige
2016	26,1 %	26,8 %	15 %	9,1 %	3 %	17 %	3,1 %
2011	40,6 %	21 %	24,5 %	4,7 %	3,5 %		5,7 %
2006	42,9 %	11,7 %	26,7 %	10,9 %	3,2 %		4,6 %

¹ 2006: WASG, seid 2011: Die Linke