Atles (estrella)
From Wikipedia, the free encyclopedia
Atles (27 Tauri / HD 23850 / HR 1178) ye una estrella que forma parte del cúmulu abiertu de les Pléyades na constelación de Tauru. La so magnitú aparente ye +3,62 y alcuéntrase a unos 440 años lluz de distancia. Ye la segunda más brillosa de les Pléyades, dempués d'Alcíone (η Tauri). Na mitoloxía griega, Atles yera'l titán padre de les Pléyades, d'onde provién el so nome.
Atles ye una estrella binaria, tando los dos componentes separaes 0,4 segundos d'arcu. Atles A, la más brillosa de les dos, ye una estrella xigante blancu-azulada de tipu espectral B8III. La so lluminosidá ye 940 vegaes mayor que la del Sol —incluyendo la radiación emitida nel ultravioleta— y la so temperatura superficial ye de 12.300 K. Al igual qu'otres estrelles de tipu espectral B, Atles A xira bien apriesa en comparanza al Sol, con una velocidá de rotación de siquier 212 km/s. Tien cierta reputación como estrella Be, implicando la esistencia d'un aniellu de material radiante productu de la rápida rotación. A partir de la so temperatura y lluminosidá envaloróse que ye una estrella 5 vegaes más masiva que'l Sol. Per otra parte, Atles A paez ser una binaria espectroscópica, que les sos componentes tienen magnitúes +4,1 y +5,6.
Atles B, de magnitú +6,8, alcuéntrase siquier a 52 UA d'Atles A. Ye una estrella de tipu A que completa una órbita alredor de la so compañera cada 150 años a lo menos.