Campu magnéticu terrestre
From Wikipedia, the free encyclopedia
El campu magnéticu terrestre (tamién llamáu campu xeomagnéticu), ye'l campu magnéticu que s'estiende dende'l nucleu internu de la Tierra hasta la llende nel que s'atopa col vientu solar; una corriente de partícules enerxétiques que emana del Sol. La so magnitú na superficie de la Tierra varia de 25 a 65 µT (microteslas) o (0,25-0,65 G). Puede considerase n'aproximamientu'l campu creáu por un dipolo magnéticu inclináu un ángulu de 15 graos con respectu a la exa de rotación (como un imán de barra). Sicasí, al contrariu que'l campu d'un imán, el campu de la Tierra camuda col tiempu porque se xenera pol movimientu d'aleaciones de fierro fundíu nel nucleu esternu del planeta tierra (la xeodinamo). El polu norte magnéticu muévese, pero d'una manera abondo lenta como por que les brúxules sían útiles na navegación. Al cabu de ciertos periodos de duración aleatoria (con un permediu de duración de dellos cientos de miles d'años), el campu magnéticu de la Tierra inviértese (el polu norte y sur xeomagnéticu permutan la so posición). Estes inversiones dexen un rexistru nes roques que dexen a los paleomagnetistas calcular la deriva de continentes nel pasáu y los fondos oceánicos resultancia de la tectónica de plaques.
La rexón percima de la ionosfera —que s'estiende delles decenes de miles de quilómetros nel espaciu— ye llamada la magnetosfera. Esta nueva capa protexe a la Tierra de los rayos cósmicos que destruyiríen l'atmósfera esterna, incluyendo la capa d'ozonu que protexe a la Tierra de la dañible radiación ultravioleta.