Citizen Kane
From Wikipedia, the free encyclopedia
Citizen Kane (Citizen Kane n'asturianu) ye una película d'Estaos Xuníos de 1941 empobinada, escrita, producida y protagonizada por Orson Welles. Ta considerada como una de les obres maestres de la historia del cine, siendo particularmente allabada pola so innovación na música, la fotografía y l'estructura narrativa. Foi estrenada por RKO Pictures.
Citizen Kane, que foi la ópera prima de Welles, ganó un Óscar al meyor guión orixinal para Herman J. Mankiewicz y el mesmu Welles. Esi sería l'únicu Óscar consiguíu por Welles en tola so carrera, a esceición del honoríficu de 1970. Tamién tuvo ente les candidates al Óscar n'otros ocho categoríes: película, direutor, actor principal, direición artística, fotografía, banda sonora, soníu y montaxe.
La historia esamina la vida y el legáu de Charles Foster Kane, un personaxe interpretáu por Welles y basáu nel magnate de la prensa William Randolph Hearst, según n'el mesmu Orson Welles.[13] Mientres el so estrenu, Hearst prohibió mentar la película nos sos periódicos. La carrera de Kane na industria editorial naz del idealismu y del serviciu social, pero evoluciona gradualmente nuna implacable busca de poder. Narrada principalmente al traviés de flashbacks, la historia cúntase al traviés de la investigación d'un periodista que quier conocer el significáu de la última pallabra que dixo'l magnate antes de morrer: Rosebud.
Tres l'ésitu de Welles nel teatru cola compañía Mercury Theatre y la so revesosa emisión radiofónica de La guerra de los mundos en 1938, Hollywood allegó a él. Robló un contratu con RKO Pictures en 1939. Diéron-y llibertá pa desenvolver la so propia historia y usar la so propia repartida y equipu de rodaxe, daqué pocu frecuente pa un direutor novel. Dempués de dos intentos atayaos de concretar un proyeutu, desenvolvió'l guión de Citizen Kane con Herman Mankiewicz.
Un ésitu ente la crítica, Citizen Kane fracasó en recuperar el so costu na taquilla. La película cayó nel olvidu poco dempués, pero la so reputación ameyoró, primero, cola crítica francesa y, sobremanera, dempués de la so reestrenu nos Estaos Xuníos en 1956. Hai un ciertu consensu ente la crítica de que Citizen Kane ye la meyor película que se rodó, lo que llevó a Roger Ebert a dicir: «Ta decidíu: Citizen Kane ye, oficialmente, la meyor película de la historia».[14] Encabezó la llista AFI's 100 años... 100 películes, ellaborada en 1998, y la so actualización del añu 2007 con motivu del décimu aniversariu. Tamién lideró toles votaciones de la revista Sight & Sound de los diez meyores películes mientres cuasi mediu sieglu.