Hábitat
From Wikipedia, the free encyclopedia
L'hábitat ye l'ambiente qu'ocupa una población biolóxica. Ye l'espaciu qu'axunta les condiciones fayadices por que la especie pueda morar y reproducise, perpetuando la so presencia. Asina, un hábitat queda descritu poles traces que lo definen ecológicamente, estremándolo d'otros hábitats nos que les mesmes especies nun podríen atopar acomodu.
El conceutu d'hábitat ye utilizáu por biólogos y ecólogos con una acepción, ente qu'arquiteutos y urbanistes faise dende una visión antrópica. Nel primer casu como'l llugar con determinaes condiciones por que viva un determináu organismu o una población d'una especie (siendo'l términu biotopu l'análogu que correspuende a una comunidá vexetal o animal). Nel segundu casu refiriéndose al espaciu construyíu nel que vive l'home.[1] Nesti casu tamién s'utiliza la espresión hábitat construyíu pa estremase del utilizáu pola bioloxía.
El Día Mundial del Hábitat ye'l primer llunes d'ochobre de cada añu.[2] Foi establecíu pola ONX en 1985 pa reconocer les meyores que se llogren nel hábitat humanu faciendo especial acentu nes ciudaes, temes de xéneru, la vivienda, el trabayu, ente otros.