Miguel Induráin
ciclista español / From Wikipedia, the free encyclopedia
Miguel Induráin Larraya[3](16 de xunetu de 1964, Atarrabia) ye un ciclista español, profesional ente 1984 y 1996.
Foi ganador del Tour de Francia mientres cinco años consecutivos (de 1991 a 1995) y del Giro d'Italia en dos causes consecutives (1992 y 1993); foi amás campeón del mundu contrarreló (1995), campeón olímpicu contrarreló (1996)[4] y posesor del récor de la hora (1994) mientres dos meses.
Amás, ganó delles vueltes per etapes d'una selmana y clásiques d'un día, destacando ente elles la Volta a Cataluña (1988, 1991 y 1992), la París-Niza (1989 y 1990), la Clásica de San Sebastián (1990), el Campeonatu d'España en Ruta (1992) y la Dauphiné Libéré (1995 y 1996),[4] destacando sobremanera nes etapes contrarreló pa consiguir eses victories, siendo simultáneamente unu de los meyores escaladores del panorama ciclista.[5]
Según el Cycling Hall of Fame ta consideráu unu de los meyores ciclistes de la hestoria (xunto a Eddy Merckx, Bernard Hinault, Jacques Anquetil y Fausto Coppi)[6] y l'octavu meyor del Tour de Francia según un xuráu compuestu por cinco especialistes franceses y escoyíu pola organización del propiu Tour.[7]
El palmarés de Miguel Induráin acredíta-y como'l meyor ciclista español de tolos tiempos y unu de los meyores deportistes de la historia del país, destacando pola so capacidá de sacrificiu y pol so saber ganar.[8][9][10][11][12] Foi gallardoniáu col Premiu Príncipe d'Asturies de los Deportes,[13] [14] ente otros premios en reconocencia a la so carrera deportiva.[15]
El so hermanu menor, Prudencio Induráin, tamién foi ciclista profesional.