Mu Leporis
From Wikipedia, the free encyclopedia
Mu Leporis (μ Lep / 5 Leporis / HD 33904 / HR 1702) ye una estrella na constelación de Lepus, la llebre, de magnitú aparente +3,28.[9][10] Alcuéntrase a 186 años lluz del Sistema Solar.[11]
Mu Leporis ye una estrella blancu-azulada de tipu espectral B9V —tamién catalogada como subxigante— con una temperatura superficial de 12.600 K. Tien una lluminosidá bolométrica 256 vegaes mayor que la lluminosidá solar. El so radiu ye 3,4 vegaes más grande que'l del Sol y xira sobre sigo mesma con una velocidá de rotación proyeutada de 15 km/s, lo que trai un periodu de rotación inferior a 11,3 díes. Tien una masa de 3,75 mases solares y, con una edá envalorada de 110 millones d'años, piénsase que ta aproximao na metá de la so vida como estrella de la secuencia principal.[11]
Mu Leporis ye una estrella de mercuriu-manganesu —una de les más brilloses de dicha clase—, destacando los elevaos niveles de manganesu, 180 vegaes más abondosa que nel Sol, y mercuriu, 70.000 vegaes más abondosa. Foi tamién clasificada como variable Alfa2 Canum Venaticorum, con una fluctuación nel so rellumu de 0,44 magnitúes.[12] Coles mesmes, ye una fonte notable de rayos X, radiación que paez nun provenir de Mu Leporis, sinón d'una compañera estelar activa. Probablemente ésta sía una estrella de baxa masa inda en formación.[11]