Red Nacional de los Ferrocarriles Españoles
From Wikipedia, the free encyclopedia
La Red Nacional de los Ferrocarriles Españoles (RENFE) foi un organismu paraestatal español de tresporte ferroviariu existente como tal ente 1941 y 2004. En 2005 dividióse n'ADIF, ente gestor de les infraestructures ferroviaries españoles, y Renfe Operadora, compañía que se quedó cola esplotación de los ferrocarriles.
Foi fundada'l 24 de xineru de 1941 a raíz de la nacionalización de diverses compañíes ferroviaries españolas, ente les que destacaben la Compañía de los Caminos de Hierro del Norte d'España (1858–1941), la Compañía de los Ferrocarriles de Madrid a Zaragoza y Alicante, M.Z.A, (1856–1941) y la Compañía del Oeste y la Ferrocarriles Andaluces, ya baxo tutela estatal, dende 1928 y 1936, respeutivamente.
L'oxetu de la creación de RENFE foi rehabilitar la rede ferroviaria española, gravemente dañada como consecuencia de la Guerra Civil, ante la situación de quiebra económica de les empreses ferroviaries qu'hasta entós habíen explotao la rede. RENFE explotó la rede ferroviaria española dende la so creación en réxime de monopoliu hasta'l día 31 d'avientu de 2004.
A partir de la década de los 1970 y principalmente en la de los 1980, RENFE entamó a rexise por una política de rentabilidá económica, polo que toes aquelles llinies que nun yeren rentables fueron zarrándose al tráficu progresivamente. El 1 de xineru de 1985 zarráronse más de 900 km de víes y llinies. Sirvan como exemplu el Santander-Mediterráneo, Andalucía–Levante (ferrocarril del Almanzora), el Valladolid–Ariza, la Vía de la Plata, etc.