Al Jennings

Alphonso J. "Al" Jennings (25 de payares de 1863, Virxinia – 26 d'avientu de 1961, Tarzana ^(es) ) foi un abogáu con exerciciu nel Territoriu d'Oklahoma, y darréu lladrón de trenes. Col pasu del tiempu aportó a una estrella del cine mudu, trabayando como actor y como asesor téunicu.

Al Jennings
Vida
Nacimientu	Virxinia, 25 de payares de 1863[1]
Nacionalidá	Estaos Xuníos
Muerte	Tarzana (es) , 26 d'avientu de 1961[1] (98 años)
Sepultura	Cementerio Oakwood Memorial Park (es)
Estudios
Llingües falaes	inglés[2]
Oficiu
Oficiu	abogáu, actor de cine
IMDb	nm0421104

Biografía

Nacíu en Virxinia, Jennings asitióse n'El Reno (Oklahoma), trabayando como fiscal del Condáu de Canadian, Oklahoma, dende 1892 hasta 1894. En 1895, xunto a los sos hermanos Ed y John, trabayó nun bufete en Woodward (Oklahoma). N'ochobre d'esi añu Ed Jennings morrió, y John Jennings resultó mancáu, nun tirotéu con un abogáu rival, Temple Lea Houston.

Jennings dexó Woodward tres l'absolución de Houston en 1896, analayando hasta consiguir emplegu como cowboy colos Creek. Mientres trabayaba cerca de l'actual Bixby, nel Condáu de Creek, Jennings sumóse a una banda de foraxíos. Nel branu y seronda de 1897 los maleantes, de cutiu llamaos la "Banda Jennings," robaron trenes, almacenes, y una oficina postal, anque con poco ésitu monetariu. Jennings foi firíu por axentes de la llei'l 30 de payares de 1897, y prindáu una selmana más tarde en Carr Creek, cerca de Onapa, nel Condáu de McIntosh (Oklahoma). En 1899 Jennings foi sentenciáu a cadena perpetua pero, gracies a los esfuercios llegales del so hermanu John, la so sentencia conmutóse por una conderga de cinco años. Por razones téuniques lliberáronlu en 1902, y recibió'l perdón presidencial en 1907.

Jennings recreó un de los sos robos a bancos nel curtiu de 1908 The Bank Robbery. Na cinta participaba Heck Thomas que, al mandu de un pelotón, prindaba a los lladrones. El curtiu foi dirixíu por Bill Tilghman, siendo James Bennie Kent el fotógrafu, y la producción al cargu de la Oklahoma Natural Mutoscene Company. El filme rodóse en Cache (Oklahoma) y nel Wichita Mountains Wildlife Refuge, teniendo Quanah Parker un pequeñu papel.^[3][4][5]

Jennings camudóse a Oklahoma City en 1911, interesándose pola política. En 1912 ganó la nominación Demócrata pa fiscal del Condáu d'Oklahoma, magar que perdió les eleiciones. En 1914 fixo un intentu infructuosu pa ser gobernador d'Oklahoma. Esfrutando de la fama que-y dio l'adautación al cine de la so biografía escrita en 1913 Beating Back, Jennings faló abiertamente del so pasáu y ganó votos gracies a la so honestidá. De seis candidatos demócrates, Jennings remató terceru nes primaries darrera de James B. A. Robertson y Robert L. Williams.

Jennings escribió otru llibru, Through the Shadows With O. Henry, que s'espublizó en 1921. Detallaba la so amistá col escritor O. Henry, col que coincidió na Penitenciaria Estatal d'Ohio, dende enantes del encarcelamientu de dambos hasta la so posterior lliberación y realcuentru en Nueva York.

Retiráu de la xusticia y de la política, Jennings foi a vivir a California, onde trabayó na industria del cine faciendo westerns. En 1951 fíxose una película sobre la so vida, Al Jennings of Oklahoma, con Dan Duryea nel papel del títulu.

Al Jennings finó en Tarzana, California, en 1961. Foi soterráu nel Campusantu Oakwood Memorial Park de Chatsworth (Los Angeles).