Antonio Mercero

Antonio Mercero Juldain (7 de marzu de 1936, Lasarte-Oria – 12 de mayu de 2018, provincia de Guadalaxara) foi un direutor y guionista de cine y televisión español, conocíu sobremanera poles sos series Verano azul, Farmacia de guardia y Crónicas de un pueblo, y pol so premiáu telefilme La cabina.^[5]

Antonio Mercero
Vida
Nacimientu	Lasarte-Oria, 7 de marzu de 1936[1]
Nacionalidá	España
Muerte	provincia de Guadalaxara, 12 de mayu de 2018[2] (82 años)
Causa de la muerte	Alzheimer
Familia
Fíos/es	Antonio Santos Mercero Ignacio Mercero
Estudios
Estudios	Universidá de Valladolid
Llingües falaes	castellanu[3]
Oficiu
Oficiu	direutor de cine, guionista
Premios	ver Medaya d'Oru al Méritu nes Belles Artes  (1997) [4] Premio Goya de honor  (2010)
IMDb	nm0580318

Trabayos nel cine

En 1960 filmó el so primer curtiu, La oveja negra. Darréu, consiguió un tituláu en direición na Escuela Oficial de Cinematografía en 1962; esi mesmu añu recibió nel Festival de San Sebastián la Concha d'Oru al meyor curtiumetraxe y el Premiu Perlla del Cantábricu por leición de arte. Un añu dempués, en 1963, dirixó'l so primer llargumetraxe, Se necesita chico, presentáu nel Festival de Bordighera (Italia). De 1966 a 1970 rodó dellos documentales para televisión.^[6]

Ente les sos películes posteriores tán Las delicias de los verdes años (1976), los ésitos de taquilla La guerra de papá (1977) y Tobi (1978), La próxima estación (1982), Buenas noches, señor monstruo (1982), Espérame en el cielo (1988), Don Juan, mi querido fantasma (1990), La hora de los valientes (1998), Planta 4ª (2003) y ¿Y tú quién eres? (2007).

Trabayos en televisión

En 1970 empezó a realizar en TVE programes de ficción. Dirixó les series Verano azul, Crónicas de un pueblo, Este señor de negro, Farmacia de guardia y Manolito Gafotas, escritu por Elvira Lindo, que ye actriz en Planta 4ª.

Ye destacable la so película estrenada en televisión La cabina (1972), protagonizada por José Luis López Vázquez, pola que recibió una amplia reconocencia y numberosos premios, Los pajaritos (1974), con Julia Caba Alba y José Orjas, y Don Juan (1974).

Vida personal

Yera padre del direutor y productor cinematográficu Ignacio Mercero (1967), y del guionista de televisión Antonio Santos Mercero (1969). En 2006 foi-y detectada la enfermedá d'Alzheimer, y dende entós retiróse de la vida pública.

Premios

• Goya d'Honor de l'Academia en 2010.^[7]
• Premiu al meyor direutor del Festival de Cine de Montreal de 2003 por Planta 4ª.
• Medaya d'Oru al Méritu nes Belles Artes (1997).
• Premiu Emmy de l'Academia Nacional de Televisión y Ciencies de Nueva York en 1973 por La cabina.
• Meyor programa dramáticu de la Canal 47 de Nueva York (1973).
• Premiu de la Crítica Internacional del Festival de Televisión de Montecarlu (1973).
• Premiu Marconi de Mifed de Milán (1973).
• Quixote d'Oru al Meyor Direutor (1972).
• Premiu Nacional (1972).
• Premiu Ondas (1972).
• Antena d'Oru (1972).
• Premiu TP d'Oru (1972).
• Mención Especial nel Festival de Cork (Irlanda).
• Premiu del Sindicatu Nacional del Espectáculu.
• Premiu na Bienal d'Arte de París en 1965 pola so práutica de fin de Carrera Trotín Troteras.
• Concha d'Oru y Perlla del Cantábricu nel Festival de Cine de San Sebastián de 1962 pol so curtiumetraxe leición de Arte.