Celeste Caeiro

Celeste Martins Caeiro (2 de mayu de 1933, Socorro – 15 de payares de 2024, Leiria), tamién conocida como Celeste dos Cravos ("Celeste de los Claveles"), foi una pacifista portuguesa. El día 25 d'abril de 1974, distribuyó claveles a los militares que salieren de los sos cuarteles para sofifar el golpe d'estáu qu'acabó col réxime dictatorial lideráu por Marcelo Caetano. Por esti motivu, la revolución sería conocida como la Revolución de los Claveles.^[8]

Celeste Caeiro
Vida
Nacimientu	Socorro[1], 2 de mayu de 1933[2]
Nacionalidá	Portugal
Llingua materna	portugués
Muerte	Leiria[3], 15 de payares de 2024[4] (91 años)
Fíos/es	1[5]
Estudios
Llingües falaes	portugués
Oficiu
Oficiu	camarera, activista pola paz, testigo contemporáneo (es)
Seudónimos	Celeste dos Cravos[6]
Creencies
Partíu políticu	Partido Comunista Portugués (es) (dende 1994)[7]
IMDb	nm14514765

Biografía

Mural de la Revolución de los Claveles.

Grafiti de Banksy en Lisboa representando claveles.

La so madre, Teodora de Viana Martins Caeiro, yera gallega, que primero vivió en Amareleja y llueu a Lisboa, darréu que'l so padre los abandonada cuando yera una guaḥa. Yera la más moza de tres hermanos.^[9][10]

Cuando Caeiro tenía 18 meses ingresó nel Centru de Día Alto do Pina y recibía visites periódiques de la so madre. A los 14 años treslladáronla al Asilu 28 de Maio. A los 20 años empecipió los sos estudios de enfermería nel Colexu Santa Clara de la Casa Pía, pero por problemes pulmonares nunca exerció esti oficiu.^[10]

Siendo adolescente, nunes vacaciones n'Alentejo, enteróse de qu'en casa de los sos tíos realizaben xuntes clandestines, y poco depués, en Lisboa, Caeiro empecipió la so militancia política mientres trabayaba nel estancu del Café Patinhas, que yera un llugar de xunta d'izquierdes y onde escondía llibros prohibíos pol réxime del Estado Novo.^[10] Tamién s'interesó pola política cuando asistía a xuicios na Corte Plenaria.^[11]

Revolución de los Claveles

Celeste Caeiro trabayaba, na dómina de la Revolución, nun restorán d'autoserviciu llamáu "Sir" na cai Braancamp de Lisboa. El restorán inauguróse'l 25 d'abril de 1973 y pol primer aniversariu la xerencia planeó dar flores y un vinu de Porto a los clientes. Esi día, sicasí, como taba trescurriendo'l golpe d'estáu, el restorán nun abrió. El xerente dixo a los trabayadores que se fueren a casa y dio-yos los claveles por que los llevaren, yá que nun podríen ser distribuyíos a los clientes. Cada persona llevó un ramu de craveles coloraos y blancos qu'había nel almacén.^[12][13]

De regresu a casa, Caeiro averóse a dos militares pa pregunta-yos qué taba pasando, a lo qu'ún respondió que diben arrestar a Marcelo Caetano y qu'españara una revolución.^[14] El mesmu home pidió-y un pitu, pero como Caeiro nun fumaba y en compensación pola "bona noticia" que-y diera, como ella dixo poco depués, regaló-y un clavel del ramu que llevaba.^[14] A partir d'entós, dende Chiado hasta la Basílica de La nuesa Señora de los Mártires apurrió'l restu de los claveles a los soldaos y a los tanques implicaos, y estos asitiaron les flores nes boques de los sos fusiles.^[8] La idea foi copiada y los vendedores de flores donaron más flores a los soldaos amotinaos.^[15][16] Les fotografíes de los soldaos con claveles nes sos armes apaecieron nes portaes de tol mundu y el golpe conocióse mundialmente como la Revolución de los Claveles y marcó la transición d'un golpe militar a una revolución pacífica y non sangrienta.^[16][11]

Al día siguiente, cuando Caeiro tornó al trabayu, los periodistes de la radio preguntáron-y d'ónde surdiera la idea de los claveles. Dio la primer entrevista a la revista Crónica Feminina.^{[17] [10]} Dende entos, cada añu, alredor del 25 d'abril, diéron-y un permisu llaboral pa poder conceder entrevistes.^[10]

El 7 de mayu de 1974, el periodista António José Saraiva escribió nel diariu República que "el clavel coloráu de la Llibertá nun tien autor conocíu, nun foi propuestu nin programáu por nenguna organización. Anónimu y natural como tolo que ta vivu".^[10][11] Darréu, Artur Varatojo, en Crónica Feminina, describió'l xestu de Celeste con un poema y como símbolu de llibertá: "En pocos díes, el clavel convirtióse na flor simbólica d'un país... La primer mano que supo asitialo con ciñu nel cañón d'un rifle... Foi una muyer (si ye una muyer), que tien derechu a una estatua inmortal."^[10][11] El testimoniu de Celeste tamién ta bien detalláu nel llibru Capitãs de Abril d'Ana Sofia Fonseca.^[11]

En 2024 participó nel desfile de conmemoración del 50 aniversariu de la Revolución de los Claveles na Avenida da Liberdade de Lisboa xunto a la so fía y la so nieta.^[11] La presencia de Celeste Caeiro nel desfile foi unu de los momentos más destacaos de la celebración popular.^[14] Na sesión solemne d'esi día na Asamblea de la República, el diputáu Rui Tavares suxirió que s'alzara una estatua de Caeiro nel edificiu de l'Asamblea.^[11]

Reconocimientos

• Medaya d'Honor de la Ciudá de Lisboa (2024)^[18]