Miden ente 100 y 170 cm de llargu y pesen ente 50 y 85 kg (los machos) y ente 55 a 75 kg (les femes) o ente 50 y hasta 90 kg, siendo les femes de mayor tamañu que los machos.^{[5][6][7][8][9]} Tienen los miembros anteriores llixeramente más llargos que los posteriores. El so pelame ye curtiu, ente amarellentáu y acoloratáu, con manches ovalaes ya irregulares de color marrón escuru que falten en cabeza, gargüelu y tórax; clina curtia y arizada; la cola tien una guedeya de pelo llargu y negru. Anque paez un perru, la hiena ta más emparentada colos félidos, y especialmente, colos herpéstidos y vivérridos. La hiena enllordiada ye la especie más grande d'hiena.^[10][11]

El periodu de xestación ye d'unos 110 díes, tres los cualos les femes paren dos críes, escepcionalmente una o trés. La críes nacen colos güeyos abiertos y pesen de media 1,5 kilogramos. En periodos de bayura tienen descendientes femes que suelen permanecer na cla y en periodos d'escasez machos que salen fuera. Los machos algamen el maduror sexual a los dos años, y les femes a los trés.

Cacen en grupos de 10 a 30 individuos, comandados por una fema dominante. Los sos poderosos quexales y potentes mueles tán preparaes pa una alimentación a base de carne, pudiendo encloyar los güesos, dientes y cornamentas de les sos preses.^{[12][13][14][15]} Anque tán consideraes como carroñeres, son cazadores que carroñen cuando ye oportunu. La so dieta abarca dende inseutos a cebres, connochaetes ya inclusive xirafes, alimentándose tanto de cadabres como de preses vives, principalmente de los animales morrebundos y enfermos.^[16] Si'l grupu d'hienes nun ye bien numberosu, los lleones suelen ganar, polo que la dentición de les hienes afecha a romper güesos déxa-yos estazar el cadabre primero que lleguen otros carnívoros. Asina, cada hiena pue llevase un cachu, esvalixase y nun dexar nada. Suelen esconder los restos de comida nel fango y la so bona memoria déxa-yos recordar ónde lo dexaron. Les hienes son desaxeradamente intelixentes y munchos espertos les consideren intelectualmente comparables a los osos ya inclusive a los simios.^[17][18]