Kenny Atkinson

Kenneth Neil "Kenny" Atkinson (2 de xunu de 1967, Huntington ^(es) ) ye un ex-xugador y actual entrenador de baloncestu d'Estaos Xuníos qu'anguaño dirixe a los Brooklyn Nets de la NBA. Con 1,85 metros d'estatura, xuega na posición de base. Tien tamién la nacionalidá española al tar casáu con una sevillana nos años nos que xugó n'España.^[2]

Kenny Atkinson
Vida
Nacimientu	Huntington (es) , 2 de xunu de 1967[1] (58 años)
Nacionalidá	Estaos Xuníos [1] España [1]
Llingua materna	inglés
Estudios
Estudios	St. Anthony's High School (en) Universidá de Richmond
Llingües falaes	castellanu
Oficiu
Oficiu	entrenador de baloncestu, xugador de baloncestu
Trayeutoria   Equipu 1986–1990 Richmond Spiders men's basketball (en) – Wichita Falls Texans (en)
Posición o especialidá	base
Pesu	80 kg
Altor	185 cm

Trayeutoria deportiva

Universidá

Xugó cuatro temporaes colos Spiders de la Universidá de Richmond, onde acabó nel décimu puestu históricu d'anotación, al consiguir 1.549 puntos, y el cuartu n'asistencies, con 464. Los sos ocho triples nun partíu son récor de la universidá.^[3] Na so última temporada lideró a los Spiders n'anotación, permediando 18,7 puntos per partíu.^[4]

Foi escoyíu Rookie del Añu de la Colonial Athletic Association en 1987, tres promediar 7,5 puntos y 4,0 asistencies per partíu, ya incluyíu nel meyor quintetu de la conferencia en 1989 y 1990.^[5]

Profesional

Tres nun ser escoyíu nel Draft de la NBA de 1990, empezó la so carrera profesional en lligues menores del so país, hasta qu'en 1992 dio'l saltu a España pa xugar nun equipu modestu, el Real Canoe, que taba na antigua Segunda División, que pasó a denominase lliga EBA dos años más tarde. D'ende pasó a otru equipu de la categoría, el Vino de Toro Zamora, qu'exercía como filial del equipu de la lliga ACB Club Baloncesto Salamanca, col que namái llegó a apostar pocu más de tres minutos nun únicu partíu.^[2][6]

Siguió na lliga EBA al añu siguiente, nel CB Aguas de Calpe, d'onde coló a la lliga italiana, al Partenope Napoli Basket, onde xugó una temporada na que permedió 11,3 puntos y 1,2 asistencies per partíu.^[7] D'ende coló al Basketball Löwen Braunschweig alemán, y siguiría la so carrera en diverses lligues europees, sobremanera en Francia, onde xugó n'hasta cinco equipos distintes, acabando la so carrera nel Hermine de Nantes Atlantique en 2004.

Entrenador

Namás acabar la so carrera como xugador empezó la d'entrenador, primero como asistente nel Paris Basket Racing de la Pro A lliga francesa mientres dos años, pa depués tornar al so país y ponese a les órdenes de Mike D'Antoni como'l so asistente nos New York Knicks, y darréu de Larry Drew y Mike Budenholzer nos Atlanta Hawks. En 2015 ponse tamién al mandu de la selección de la República Dominicana.^[2]

Namás rematar la temporada 2015-16 de la NBA, los Brooklyn Nets anunciaron la so contratación como entrenador principal.^[3]