Miriam Makeba
From Wikipedia, the free encyclopedia
Remove ads
Zenzile Miriam Makeba (4 de marzu de 1932, Johannesburgu – 9 de payares de 2008, Castel Volturno (en) 
), conocida tamién como Mamá África, foi una cantante sudafricana y activista polos derechos humanos, iconu de la llucha contra'l racismu y l'apartheid en Sudáfrica.[9][10]
Remove ads
Biografía
Nació'l 4 de marzu de 1932 en Johannesburgu, Sudáfrica y pertenecía a la etnia xhosa. Pasó la so infancia en Pretoria (Transvaal). Empezó la so carrera nos años cincuenta como cantante col grupu Manhattan Brothers, y dempués fundó la so propia banda, The Skylarks, qu'entemecía jazz con música tradicional sudafricana.[11][12]
En 1949, Makeba casó col policía James Kubay, del que se dixebró dos años dempués y con quien tuvo a la so única fía, Bongi Makeba, en 1950. Poco dempués diagnosticáron-y un cáncer de mama, y el so home, que se dicía que la cutía, dexóla poco dempués, tres dos años de matrimoniu. Una década más tarde tuvo un cáncer de pescuezu d'úteru que tamién superó.[13]
A los 27 años decidió dise de Sudáfrica para poder siguir cola so carrera musical, yá que pol so activismu túvolo difícil pa conseguilo nel so país natal. Makeba viaxó a Venecia para dempués consiguir llegar a Londres, onde conoció al cantante estauxunidense Harry Belafonte, quien la ayudó a entrar n'Estaos Xuníos y col que s'acomuñó artísticamente.[14]
En 1969, Makeba casó col activista negru de Trinidá y Tobagu Stokely Carmichael, líder del Partíu Pantera Negra, del quien se dixebró cuatro años dempués. El so matrimoniu espertó les rocees de les autoridaes norteamericanes, polo que tuvieron qu'emigrar a Guinea. Dempués casó col trompetista de jazz sudafricanu Hugh Masekela.
Cuando en 1960 trató de tornar pal funeral de la so madre, afayó qu'el so pasaporte fuera anuláu pola so postura contraria al apartheid, lo que-y fixo vivir nel exiliu mientres más de trés décades, morando nesa etapa n'Estaos Xuníos, Francia, Guinea y Bélxica. Nelson Mandela, tres la so lliberación, convenció a Makeba por que volviera al so país natal y ufiertó-y un cargu de ministra nel so gobiernu, anque nun aceptó'l cargu.[15][12][16]
Frutu del so defensa de los derechos humanos, creó la fundación humanitaria Zenzile Miriam Makeba, qu'en 2001 punxo en marcha'l Centru de Rehabilitación Miriam Makeba para Neñes.[17]
Finó'l 10 de payares de 2008 en Castel Volturno, nel sur d'Italia, por causa d'un paru cardiacu que sufrió poco dempués de participar nun conciertu contra'l racismu y la mafia en favor del periodista y escritor italianu Roberto Saviano, autor del llibru Gomorra. Foi incinerada y les sos cenices espardíes nel Océanu Atlánticu en Cabu Point na so natal Sudáfrica.[13][15][18]
Remove ads
Reconocencies
En 1965 recibió'l premiu Grammy, compartíu col músicu, actor y activista social d'Estaos Xuníos d'América d'ascendencia xamaicana Harry Belafonte. Convirtióse asina na primer muyer negra en recibir un premiu Grammy.[19][20]
Recibió la Orde francesa de les Artes y les Lletres en 1985 y en 1990 concediéron-y la nacionalidá francesa, apurriéndo-y el pasaporte por que pudiera tornar a país natal dempués de más trés décades nel exiliu. En 1991 llogró en Tunicia'l Premiu Nelson Mandela.[15][17]
El 16 d'ochobre de 1999, foi nomada embaxadora de bona voluntá de la Organización de les Naciones Xuníes pa l'Agricultura y l'Alimentación (FAO). En 2001, foi gallardionada col premiu de la paz Otto Hahn, otorgáu pola Asociación Alemana de la ONU. Un añu dempués foi gallardionada col Premiu de Música Polar qu'otorga la Real Academia Sueca de Música[9] y cola Lexón d'Honor francesa.[21][17]
Remove ads
Referencies
Enllaces esternos
Wikiwand - on
Seamless Wikipedia browsing. On steroids.
Remove ads