Pieris brassicae

Pieris brassicae ye una especie de lepidópteru ditrisio de la familia Pieridae, y foi descrita por Carlos Linneo en 1758.^[1] La canesba  alimentase de fueyes de plantes de la familia Brassicaceae o crucíferas, especialmente de la col, llegando a constituyir una plaga pa los cultivos. Ye frecuente confundila cola caparina menor de la col (P. rapae), yá que tanto'l so aspeutu como los sos vezos son bien similares.^[2][3]

Pieris brassicae
Clasificación científica
Reinu:	Animalia
Filu:	Arthropoda
Clas:	Insecta
Orde:	Lepidoptera
Suborde:	Glossata
Infraorde:	Heteroneura
División:	Ditrysia
Seición:	Rhopalocera
Familia:	Pieridae
Xéneru:	Pieris
Especie:	P. brassicae (Linnaeus, 1758)
Consultes
[editar datos en Wikidata]

La so distribución toma casi tol Paleárticu, esto ye, toa Europa, Norte d'África y gran parte d'Asia, hasta l'Himalaya, China, Colombia, Rusia y Xapón.^[4] N'América del Norte apaecieron dellos exemplares, pero nun paez establecida. En 2010 atopóse'n Nelson, Nueva Zelanda.^[5] Ellí considérase una plaga col potencial de causar serios problemes a les colleches.^[6]

El so estáu de caltenimientu nun reviste esmolición y nun s'atopa incluyida na Llista colorada de la UICN.^[7][8]

Descripción

Los adultos miden ente 50 y 60 mm de valumbu, los machos menores que les femes. Son de color blancu, sacante una mancha negra na mariña o zona apical. Les femes estrémense fácilmente de los machos yá que tienen dos puntos negros en caúna de les sos ales anteriores. Nes ales posteriores tamién apaez un puntu nel so marxe anterior. Les manches negres de normal son más escures nes xeneraciones nacíes pel branu. Ventralmente son de color verde maciu de cuenta que queden mimetizadas cuando se posen ente los arbustos.^[2]

Los güevos son allargaos y de color mariellu maciu. Nun devasen los 2 mm de llargu nin los 0,5 d'anchu. Les canesbes al nacer son de color abuxáu. Cuando crecen tienen la mayor parte del cuerpu d'un color gris verdosu, con tres llinies marielles llonxitudinales bien marcaes; una asitiada na metá del envés y les otres dos enriba de los espiráculos. El so envés contién numberoses maches negres. Presenten numberoses cogordes a lo llargo de tol cuerpu. El so aspeutu, al pie del so desagradable golor, sirven pa estornar a los depredadores.

• 
  Pieris brassicae ♂
• 
  Pieris brassicae ♂ △
• 
  Pieris brassicae ♀
• 
  Pieris brassicae ♀ △

Ciclu

Bárabu y güevos

Ye una especie bivoltina (con dos xeneraciones per añu).^[2] La dómina de reproducción empieza en primavera —primer xeneración— y toma tol branu —segunda xeneración—. La fema deposita ente 20 y 100 güevos nel fexe de les fueyes de plantes de la familia Brassicaceae, onde s'atopen numberosos cultivos d'agricultura y horticultura.

Antes de dos  selmanes los güevos eclosionen. Al contrariu qu'otres caparines de la familia, les canesbes viven en grupu. A partir de la primer muda les canesbes yá ocuparon tola planta, estremándose en grupos más pequeños. Con cada muda les canesbes aumenten de tamañu y riquen mayores cantidaes d'alimentu, lo cual puede causar graves perxuicios económicos si se atopa en terrenes cultivaos.

Pupa

Realicen la so crisálida nes plantes nutricies y a principios del branu eclosionen y apáriense. Esta nueva xeneración de gates aliméntense hasta los primeros díes fríos de seronda, momentu en que se camuden en crisálida pa pasar l'iviernu.^[2]