SARS-CoV-2

El coronavirus-2 del síndrome respiratoriu agudu grave (SARS-CoV-2) ye un coronavirus causante de la enfermedá por coronavirus (COVID-19).^[1][2][3] Primeramente, el virus foi llamáu 2019-nCoV (del inglés 2019-novel coronavirus). Foi descubiertu y aislláu per primer vegada en Wuhan, China, tres provocar la epidemia de COVID-19.

Alvertencia: Wikipedia nun ye un consultoriu médicu nin farmacolóxicu. Si pienses que necesites ayuda, por favor, fala con una persona profesional de la salú.

Pa ver la enfermedá provocada por esti virus, COVID-19.

SARS-CoV-2
Clasificación de los virus
Dominiu:	Acytota
Grupu:	IV (Virus ARN monocatenariu positivu)
Reinu:	Riboviria
Orde:	Nidovirales
Suborde:	Cornidovirineae
Familia:	Coronaviridae
Xéneru:	Betacoronavirus
Especie:	Severe acute respiratory syndrome-related coronavirus
Sinonimia
2019-nCoV (2019 Novel Coronavirus)
Consultes
[editar datos en Wikidata]

El xenoma del virus ta formáu por una sola cadena d'ARN, polo que se clasifica como ARN monocatenariu positivu. La so secuencia xenética aisllóse dende una muestra d'un paciente afectáu por neumonía na ciudá china de Wuhan.^{[4][5][6][7][8][9]} Foi detectáu per primer vegada n'avientu de 2019. Nun se conoz el mecanismu exautu de tresmisión, pero se cree que pue producise'l contaxu d'una persona a otra per aciu de les gotes de saliva espulsaes al traviés de la tos y l'estorníu. Pue provocar enfermedá respiratoria aguda y neumonía grave n'humanos.

Anguaño, nun hai nengún tratamientu específicu aprobáu oficialmente, pero pueden utilizase los antivirales esistentes. Como midíes preventives encamentóse llavase frecuentemente les manes y evitar el contactu cercanu con persones afectaes.^[10]

El 30 de xineru de 2020, el Comité d'Emerxencies del Reglamentu Sanitariu Internacional de la Organización Mundial de la Salú (OMS) declaró una emerxencia de salú internacional por SARS-CoV-2.^[11]