Куньлунь Ред Стар

«Куньлунь Ред Стар» (ҡыт. 紅星崑崙) — Ҡытайҙың баш ҡалаһы Пекиндың 2016 йылда ойошторолған шайбалы хоккей клубы. 2016/2017 йылдар миҙгеленән башлап Рәсәйҙең Континенталь хоккей лигаһында сығыш яһай. Уйындарын Шоуган Арена боҙ һарайында үткәрә.

«Куньлунь Ред Стар» Пекин
Ил:	Ҡытай
Ҡала:	Пекин
Нигеҙләнгән:	2016
Өй аренаһы:	Шоуган Арена (3 000)
Төҫтәр:
Хоккей лигаһы:	КХЛ
Дивизионы:	Чернышёв
Конференцияһы:	Көнсығыш
Баш тренеры:	Курт Фрэйзер
Президент:	Раитис Пилсетниекс
Генераль менеджер:	Раитис Пилсетниекс
Капитан:	Брэндон Ип
Аффилир-клубы:	«КРС ОЭРДЖИ» (ЮХЛ) «КРС Хэйлунцзян» (ЙХЛ)
Рәсми сайт:	http://hcredstar.ru/

Үҙ тарихында КХЛ-да тәүге миҙгелендә үк плей-офф уйындарына эләгә, шунда беренсе еңеүен яулай.

Тарихы

2015 йылдың декабрь айында КХЛ директорҙары кәңәшмәһенең ағзаһы Роман Ротенберг Континенталь хоккей лигаһына Ҡытайҙы алыу тураһындағы пландарҙы әйтә^[1][2]. Ротенберг аныҡ команда исемен атамай, әммә уның Ҡытай етәкселеге тарафынан яҡшы финанслауына шикләнмәүен билдәләй.

2016 йылдың 17 мартында РХФ президенты Владислав Третьяк, КХЛ директорҙары кәңәшмәһе рәйесе Геннадий Тимченко һәм яңы клубтың директорҙар кәңәшмәһенең рәйесе Нгок Ян Юу ҡатнашлығында ниәттәр тураһында килешеү төҙөлә һәм клубтың «Куньлунь Ред Стар» тип аталыуы билдәле була^[3][4]. Әммә Ҡытай хоккей федерацияһының генераль сәркәтибе Лисинь Тун Ҡытай хоккей клубының КХЛ-ға тиҙ арала инеүе тураһында әлегә уйламауҙарын белдерә^[5].

2016 йылдың 24 июнендә «Куньлунь Ред Стар» хоккей клубы Лигаға рәсми ҡабул ителә. Команда составын күпселектә Рәсәй, Европа илдәренең уйынсылары тәшкил итәсәк, шулай уҡ унда Ҡытайҙың үҙ хоккейсылары буласағы тураһында хәбәр ителде. Тәүҙә команданы билдәле Майк Кинэн етәкләйәсәк^[6] һәм уға Илья Ковальчук^[7] килеүе тураһында мәғлүмәт була, әммә ул дөрөҫкә сыҡмай^[8]. Артабан команданың генераль менеджеры итеп Владимир Кречин ҡуйыла, ә баш тренер вазифаһына Владимир Юрзинов килә^[9]. Командаға алынған тәүге уйынсы — Финляндиянан ҡапҡасы Томи Кархунен^[10].

2016 йылдың 24 июлендә «Куньлунь» үҙ тарихында тәүге уйынын уҙғара һәм «Трактор» хоккей клубына 0:2 иҫәбе менән отола^[11]. 6 августа Пекин командаһы «Барыҫ» хоккей клубын 3:1 иҫәбе менән отоп, үҙ тарихында тәүге уйынын еңә^[12]. 8 августа Ҡаҙағстан Республикаһы президенты кубогында «Куньлунь» менән «Барыҫ» тағы осраша. Астана командаһының уйынсыһы Дамир Рыспаев дәғүәселәргә ташлана. «Куньлунь» һөжүмсеһе Марцинко уйындан һуң дауаханаға оҙатыла, ә уйын өсөнсө минутта туҡтатыла, сөнки Владимир Юрзинов командаһын боҙҙан алып китә. Ҡытай командаһы техникалы еңелеүгә дусар була^[13]. Тольяттиҙа миҙгел алдынан үткән «Лада» кубогында «Ред Стар» икенсе урынды яулай.

2016 йылдың 1 сентябрендә команда КХЛ-да тәүге рәсми уйынын үткәрә һәм Хабаровскиҙа «Амур» хоккей клубын 2:1 иҫәбе менән еңә^[14]. Шон Коллинз клубтың рәсми уйында тәүге шайбаһын керетә. 27 сентябрҙә «Куньлунь» «Харбин» хоккей клубы нигеҙендә Ҡытай хоккей лигаһында сығыш яһаған фарм-клубын төҙөй^[15].

207 йылда КХЛ йондоҙҙар уйынына саҡырыу алған Чед Рау «Куньлунь» тарихында тәүге шундай хоккейсы. Ул командаһы менән турнирҙы еңә. Ә Ҡытай командаһы иһә даими миҙгелде конференцияла һигеҙенсе урында тамамлай һәм плей-оффта ҡатнашырға хоҡуҡты ала. Гагарин кубогының беренсе раундында «Куньлунь» Магнитогорскиҙан «Металлург» хоккей клубына серияла 1-4 иҫәбе менән отола. Миҙгелдең һуңғы уйынынан һуң Владимир Юрзинов команданан китеүе тураһында иғлан итә^[16]. Клуб етәкселеге билдәле Канада белгесе Майк Кинэнды баш тренеры итеп ҡуя^[17].

2017 йылдың май айында команданың Юғары хоккей лигаһында сығыш яһаған «Куньлунь Ред Стар Хэйлунцзян» исемле фарм-клубы төҙөлә. Шул уҡ йылдан башлап Йәштәр хоккей лигаһында «Куньлунь Ред Стар Юниор» хоккей клубы төҙөлә. 3 декабрҙә команданың баш тренеры Майк Кинэн насар һөҙөмтәләр өсөн эш урынын бушата. Баш тренерҙың ваҡытлыса вазифаһын башҡарыусы тип Бобби Карпентер ҡуйыла^[18]. Команда Көнсығыш конференцияһында 12-се урында миҙгелде тамамлай.

2018 йылдың 23 февралендә «Куньлунь» баш тренеры итеп Юсси Тапола ҡуйыла. Командағы өс яңы ҡапҡасы килә, шулар араһында Александр Лазушин. Яңы уйынсылар араһынан Патрик Лунд, Олли Палола, Вилле Лаюнен һәм Вели-Матти Савинайнен айырылып торалар. Тик команда тағы ла Гагарин кубогының плей-офф уйындарына эләгә алмай. 2019/2020 йылдар миҙгелендә команданы АҠШ белгесе Курт Фрэйзер етәкләй. Ошо миҙгелдә «Куньлунь» Шэньчжэнь ҡалаһында 6 осрашыу үткәрә.

Континенталь хоккей лигаһында сығыш яһау һөҙөмтәләре

У — үткәргән уйындар һаны, Е — төп ваҡытта еңеүҙәр һаны, ЕО — овертаймда еңеүҙәр, ЕБ — буллиттарҙа еңеүҙәр, БО — буллиттарҙа отолоуҙар, ОО — овертаймдарҙа отолоуҙар, О — төп ваҡытта отолоуҙар һаны, М — йыйылған мәрәйҙәр һаны, Ш — кереткән һәм үткәргән шайбалар нисбәте, ДМ — даими миҙгел һөҙөмтәләре буйынса урыны

Миҙгел	У	Е	ЕО	ЕБ	БО	ОО	О	М	Ш	ДМ	Плей-офф
2016/17	60	24	2	2	3	0	29	139—144	83	16	Сирекфиналда еңелеү (1-4 Металлург Мг)
2017/18	56	15	3	1	5	3	29	103—146	61	23	Плей-оффҡа эләкмәйҙәр
2018/19	62	19	0	1	5	6	31	142—190	51	20	Плей-оффҡа эләкмәйҙәр
Бөтәһе	116	58	5	4	13	9	89	384—480	195

Стадион

«Куньлунь Ред Стар» өйҙәге уйындарын Пекиндағы 18 мең кеше һыйҙырышлы МастерКард-Центр аренаһында үткәрергә тейеш ине. Был спорт ҡоролмаһында 2008 йылда Олимпия уйындарының баскетбол буйынса турниры үтә. Тәүҙә уйындарҙың был аренала үтәсәге шик аҫтында ла була, сөнки аҙнаның биш көнөндә ул Ҡытайҙа ныҡ популярлыҡ яулаған баскетболға бирелә, өҫтәүенә аренаның үҙенең боҙо менән һыуытҡыс ҡоромалдары булмай^[19]. Тик был мәсьәлә хәл ителә.

«Куньлунь» алмашлап уйындарын Шанхайҙа «Фэйян» боҙло һарайында ла үткәрә. 2018/2019 йылдар миҙгеленән алып Пекинда 3000 кеше һыйҙырған Шоуган Аренала уйындарын уҙғара.

Бағыусылар

Команданың генераль менеджеры Владимир Кречин «Советский Спорт» гәзитендәге интервьюһында, энергетика һәм төҙөлөш өлкәләрендә эшләгән өс ҙур компания команданың бағыусыһы була, тип әйтә^[20].

Етәкселек

• Директорҙар кәңәшмәһенең рәйесе - Билли Нгок.
• Президент, директорҙар кәңәшмәһенең рәйесе урынбаҫары — Ао Менг.
• Хоккей операциялары буйынса вице-президент — Скотти Макферсон.
• Финанс директоры — Малкольм Фо
• Вице-президент — Мэнсфилд Йех
• Административ һәм хоҡуҡ һорауҙары буйынса вице-президент — Йупинг Хе

Тренер штабы

• Баш тренер — Курт Фрэйзер
• Тренер — Юрки Ахо
• Тренер — Алексей Ковалев
• Ҡапҡасылар тренеры — Сакари Линдфорс
• Физик әҙерлек буйынса тренер — Матиас Сарвела
• Видео-тренер — Михаил Быков

Баш тренерҙар

«Куньлунь Ред Стар» командаһының бөтә баш тренерҙары:

Владимир Юрзинов (2016—2017) Майк Кинэн (2017—3 декабрь 2017) в.б. Бобби Карпентер (3 декабрь 2017—23 февраль 2018) Юсси Тапола (23 февраль 2018—18 ғинуар 2019) Курт Фрэйзер (18 ғинуар 2019)

Составы

Ҡапҡасылар
№	Ил	Исем	Тыуған йыл
		Шимон Грубец	30 июнь, 1991
32		Сунь Цзэхао	13 декабрь, 1995
		Джордан Лием	30 апрель, 1993
		Джереми Смит	13 апрель, 1989
Һаҡсылар
№	Ил	Исем	Тыуған йыл
18		Мэтью Майоне	21 ноябрь, 1990
		Тревор Мёрфи	17 июль, 1995
22		Микаэль Там	26 апрель, 1991
88		Виктор Бартли	17 февраль, 1988
		Джейсон Фрэм	23 апрель, 1995
		Джейк Челиос	8 март, 1991
		Андрей Шустр	29 ноябрь, 1990
93		Зак Юйэнь	3 март, 1993
Һөжүмселәр
№	Ил	Исем	Тыуған йыл
9		Кристофер Сето	10 июнь, 1997
16		Войтех Вольски	24 февраль, 1986
19		Брэндон Дефацио	13 сентябрь, 1988
20		Лукас Локхарт	1 ноябрь, 1992
34		Олли Палола	8 апрель, 1988
41		Жильбер Брюле	1 ғинуар, 1987
47		Кори Кейн	15 сентябрь, 1990
67		Ян Ху	9 декабрь, 1996
94		Джош Николлс	27 апрель, 1992
		Тайлер Вон	28 февраль, 1996
		Адам Крэкнелл	15 июль, 1985
		Алекс Рич	28 июль, 1996
		Спенсер Фу	19 май, 1994
		Гарет Хант	14 октябрь, 1987
98		Руди Ин	16 август, 1998

Капитандар

• Янне Яласваара (2016—2017)
• Алексей Поникаровский (2017—2018)
• Брэндон Ип (2018—2019)

Ҡаҙаныштар

• «Лада» кубогының көмөш миҙалсыһы (Тольятти, 2016)
• 1 ! И. Ромазан мемориалы еңеүсеһе (Магнитогорск, 2017)

Ҡыҙыҡлы мәғлүмәт

• 2018 йылдың 7 авгусында легендарь һөжүмсе Уэйн Гретцки команданың глобаль илсеһе була. Хоккейсы командаға медиакиңлектә үҫешергә ярҙам итәсәк һәм «КРС — Гретцки» хоккей мәктәбен асасаҡ^[21].

Статистик мәғлүмәт

• Тәүге уйын: 0:2 «Трактор» (24 июль 2016)
• Тәүге гол кереткән уйынсы: Туукка Мянтюла (2 август 2016, «Амур» 3:5)
• Тәүге еңеү: 3:1 «Трактор» (6 август 2016)
• Тәүге рәсми уйын һәм еңеү: 2:1 «Амур» (1 сентябрь 2016)
• Рәсми уйында тәүге гол кереткән уйынсы: Шон Коллинз (1 сентябрь 2016)
• Ҡапҡаһын «ҡоро» ҡалдырған тәүге ҡапҡасы: Андрей Макаров (17 август 2016)
• Бер уйында ике гол индергән тәүге уйынсы: Чед Ро (6 август 2016, «Барыҫ» 3:1)
• Иң ҙур айырма менән еңеү: 5:0 «Медвешчак» (28 ғинуар 2017)
• Бер гол да үткәрмәйенсә иң ҙур айырма менән еңеү: 5:0 «Медвешчак» (28 ғинуар 2017)
• Иң ҙур айырма менән еңелеү: 1:8 СКА (18 ноябрь 2017)