Ostmiddlboarisch

Ostmiddlboarisch oda Ostmiddlbairisch (dt.: Ostmittelbairisch) nennd ma de boarischn Dialekt, de wos ma in Wean und in an Großteu vau Owa- und Niedaestareich, im Noadn vom Buagnlaund, in da Owasteiamoak und in da Stod Soizburg redn duat. Stoak vaafocht kennt ma des Ostmiddlboarische min Estareichischn gleichsetzn, in da Praxis is des owa vü differenziata zum seng.

Der Artikl is im Dialekt Ostmiddlboarisch gschriem worn.

Des Zentrum vaum Ostmiddlboarischn is Wean, vau wo de Entwicklung ausgaungan is. Da Einfluss vaum Weanarischn mocht si owa inzwischn praktisch iwaroi im boarischn Sprochgebiet vo Estareich bemeakboa. Auf da aundan Seitn gibts aa im aissastn Ostn vo Estareich Leit, de wos beispüsweis stott "ans, zwa" "oans, zwoa" song. A exakte Gebietsaufteulung zwischn Ostmiddlboarisch und Westmiddlboarisch is desweng in Östareich praktisch ned meglich. Natialich gibts vaschiedane Schwaapunkt. In Wean heat ma praktisch ka Westmiddlboarisch, obwoi's davau no Restln gibt (z. B. 'Haisal am Roa' bzw. 'Häuserl am Roan'), in Westobaöstareich und im Soizburga Laund heat ma nua gaunz wenig Ostmiddlboarisch.

Beispü

Isoglosse	Westmiddlboarisch	Ostmiddlboarisch
ui vs. ü (< ahd. il):	vui	vü
	Spui, Spuin	Spü, Spün
	i wui, mia woin	i wü, mia woin
ej vs. ö (< ahd. el):	Fejd, Gejd, schnej, stejn (<ahd. stellen)	Föd, Göd, schnö, stöün
o/or/oar vs. oa (< ahd. ar):	i for, mia forma	i foa, mia foan
	hort, heata	hoat, heata
o vs. au (< ahd. au):	i kaf, mia kaffa(n)	i kauf, mia kauffn
on vs. aun (< ahd. an):	Lond	Laund
ungsetzmäßi:	i kimm, mia kemma(n)	i kumm, mia kumman

Beleg

• Hartmut Traunmüller: Der Vokalismus im Ostmittelbairischen

Im Netz

• Remaraweng Boarisch: Der bairische Sprachraum