Pro Nessia

S´Pro Nessia (Lodainisch: Fia de Wiama) is a oidboarischs Gebed, zan kuarian fu Ressa, wauns fu Wiama befoin han. Dea kuaze Text is in am Manuskript aus'n Glosda Teganse iwalifat und is woaschainli im 9dn Joahundat aufgschrim woan.

Der Artikl is im Dialekt Hausrukfiatlarisch gschriem worn.

Waun a Ros de Wiam ghobt hod, hod ma des Gsazl zan Wentn aufgsogt

In da Fochlitaratua wiad a maunchmoi ois deitscha Zaubaschbruch bezaichnet, wos owa ned umbedingt aso schdimt. Easchdns amoi is de Schbroch fu dem Schbrichal Oid-Boarisch und ned Deitsch, wai a deitsche Schbroch hods zu deara Zeid nu goa ned gem. Zwoatns is des a kristlicha Gebedsschbrichal, wos mid am Fawais auf s'Fota Unsa aufhead. Es is oiso koa heitnischa Zaubaschbruch aus friageamanischa Zeid, sondan entschbricht eha so wos wia im Wentaschbrichal, grod aso wias fu de Boda und Boarichda nu bis ins 20de Joahundat aufgsogt woan han, waun ma dafia bet hod, das a Graunkheit weka ged.

S'Manuskript wo des Rosschbrichal drin schded, is heit in da Mingara Schdodsbibliodek unta da Signatua clm 18524 S.203^v zan findn.

Da Oaginaldext

Pro Nessia, Teganse, 9ts Joahundat	heitigs Boarisch
Gang uz, Nesso,* mit niun nessinchilinon, uz fonna marge in deo adra, vonna den adrun in daz fleisk, fonna demu fleiske in daz fel, fonna demo velle in diz tulli.** Ter pater noster.	Ge aussi, Wuam mid nein Wiamal aussi fum Mark in de Odan, fu de Odan in des Flaisch, fu dem Flaisch in des Fel, fu dem Fel in de Tüln Drai Pater Noster.

* nesso hoast ungefea so wos wia Wuam, oda iagend a kloans Insektngfikad. Des heitige Dialektwoat "Nissn" fia Kobflais is woaschainli damid fawaunt.

** tulli hoast in dem Zusaumenhaung woaschainli de hoanige Untaseit fum Huaf fu de Ressa. Oiso fum Fö soin de Wiama glai unta d'Huaf fum Ros schbringa, dass dadret wean. Genau woas ma des owa ned.^[1]

Trivia

De Nissn, geng de des Schbrichal gricht is, wean woaschainli de Harling gwen sei, a 1,5 Milimeta kloans Insekt wos ois Parasit auf ole meglichn Ficha lebt, bsondas a im Fö fu Ressa. Da biologische Fochbegrif fia de Parasitn is Trichodectidae.

Beleg

Wikisource

Boarischa Text: Althochdeutsche Zaubersprüche – gmoafreie Originaltext

• Uni Frankfuat: Minor Old High German Monuments - mid kompletn Oaginaldext
• Ruhr Uni Bochum: Pro Nessia - mid kompletn Oaginaldext
• Uni Basel Deutsche Zaubersprüche - mid Iwasezung
• Kratz, Bernd: Die altdeutschen Sprüche "Pro Nessia" und ein französischer Hippiatrie-Traktat des 15. Jahrhunderts. In: ABäG 34 (1991), S. 23-31.