Enot na Vision
From Wikipedia, the free encyclopedia
An Enot na Bisyon (pinag-apod man na eksperiyensiya sa kakahuyan) minapanungod ini sa sarong bisyon na si Joseph Smith, Jr. an nagsabi na saiyang naresibe sa amay na kinaomagahon kan tiglagas 1820, sa sarong makahoy na lugar sa Manchester, New York, na pinag-apod kan saiyang mga parasunod na Sagradong Kakahuyan. Pinagpahayag ini ni Smith bilang sarong personal na Teopaniya[1] na kun saen siya nakapagresibe nin sarong kapatawaran kan mga kasalan. An mga parasunod ni Smith naniniwala na an bisyon nakapagpadugang kan saiyang awtoridad bilang pundador asin propeta kan Kahiroan nin Mga Banal sa Huring Aldaw. Uyon sa kasaysayan na si Smith an nag-estorya kan 1838, siya nagpasiring sa mga kakahuyan tanganing magpangadye manunungod sa kun arin na simbahan an pag-ayunan alagad nahulog sa kapyot nin sarong maraot na kapangyarihan na haros makapagdaog saiya. Sa huring momento, siya pinagtabangan nin duwang malaadon na mga “personahe” (pinagtutubudan na sinda Jesus asin Diyos Ama) na nakalataw sa kaibabawan niya. Saro sa mga nilalang nagsambit ki Smith na dae makibale sa arin man na eksistidong mga simbahan nin huli ta gabos nagtutukdo nin bakong tamang mga doktrina.
Si Smith nagsurat nin nagkapirang mga kasaysayan kan bisyon magpoon kan 1832, alagad mayo ni saro sa mga estorya an pinagpublikar sagkod sa panahon kan 1840. Maski na ngani na si Smith nagsasaysay nin iba pang mga bisyon, an Enot na Bisyon iyo an esensiyal na bakong bantugan sa mga amay na Mga Banal sa Huring Aldaw; an eksperiyensiya ni Smith dae nagin importante sa Kahiroan nin Mga Banal sa Huring Aldaw sagkod kana may na ika-20 siglo, kunsoarin ini nagin kapusugan kan restorasyon nin Mga Banal sa Huring Aldaw. An bisyon man an nagribay sa poligamiya [2] bilang saro sa mga nagpakahulugan na mga element nin Mormonismo asin nagsusunsay nin distinktibong mga doktrina nin Mormon siring baga sa kahawakan-natural kan Diyos Ama asin an kaunikohan kan Mormonismo bilang iyo sanang tunay na dalan pasiring sa kaligtasan.
An mga kritiko may pangaputan na manlaen-laen na mga opinyon manunungod sa tunay na natura kan Enot na Bisyon, pinaniniwalan na ini sarong pangiturugan, sarong pagdidiliryo, sarong pansadiring-kadayaan, sarong intensyonal na gibo-gibo, o baya pinagkumbinasyon kan mga bagay na ini.