Harry Potter
From Wikipedia, the free encyclopedia
An mga librong Harry Potter seryeng popular nin mga librong pantasya na an kagsurat iyo si J.K. Rowling. An bidang karakter igdi sa mga usipon iyo si Harry Potter. Sa mga libro, an pantasya dapit sa mahika. Si Harry Potter namundag na may kapangyarihan sa pagmadyik huli ta siya sarong wizard. Saiyang nadiskubre na dakol man palan mga tawo na may kabatiran sa pagsalamangka, asin dakul pa man na mga wizard asin mga asuwang igdi sa kinaban na nabubuhay dai aram lamang kan mga tawong mayong darupi' sa pagsalamangka' (na inaapod nindang "muggles"). Kan siya onse, nakaresibi siya nin surat na nag'aagda saiya na mag'entra sa sarong eskwelahan na an pangaran Hogwarts na binibilog nin mga hubin na mga aswang asin mga wizard. An lambang libro pigsasaysay an buhay niya sa eskwelahan na ini, manongod sa mga tawo na nabisto y nasumpongan niya igdi, mga bagay na saiyang nano'dan asin an mga adbentura niya.
Igwang kagabsan na pitong libro sa serye. May serye nin mga pelikula an ginibo na kan Warner Bros. para sa enot na anom na libro. Pigpo'nan kaini an pagpelikula kan 2001. An ika-anom, Harry Potter and the Half Blood Prince, pinagpasale na kan Hulyo 7, 2009. An enot na kabangang kabtang kan ikapito na iyo na an ultimong pelikula, an Harry Potter and the Deathly Hallows, pinaluwas na kan Nobyembre, 2010. An ikaduwang kabtang ipapaluwas sa Hulyo, 2011.
Poon kan pigpaluwas an enot na nobela kan Hunyo 30, 1997 Harry Potter and the Philosopher's Stone, an mga libro grabe an ginuno na popularidad, pag'omaw na gayo asin labilabing pagbenta sa bilog na kinaban[1] An serye totoo nag'ani man nin mga tuyaw, orog na ta an tenor garo malaen nang madyik. An serye nin mga libro, kun isisikad sa Hunyo 2011, nagbenta nang 450 milyon na kopya asin napalis na sa 67 lenggwahe.[2][3] asin an ultimong apat na libro nagpako nin rekord sunodsunod na iyo na an pinakamasulong na mga libro sa bilog na historya kan kinaban.
Bilang serye ini nin iba-ibang genre, na kaiba na diyan an pantasya, pagdangadang nin bagong panahon, fiction, romansa, thriller, ini tagob nin mga kahulogan sa kultura.[4][5][6][7] Susog ki Rowling, an mayor na tema iyo an kagadanan,[8] dawa totoo primeramente konsiderado ining literaturang pang'aki. Igwa pa man nin ibang mga tema sa serye, arog kan pagkamoot asin pag'ori.[9] An mga bersyon sa Ingles napublikar kan Bloomsbury sa Reyno Unido, kan Scholastic Press sa Estados Unidos, kan Allen & Unwin sa Australya, asin kan Raincoast Books sa Kanada. Sa Oktobre 2011, an serye ipapaluwas sa pormang e-libro paagi sa "Pottermore."[10] An mga libro ginibo sa walong parte kan Warner Bros. Pictures, ta pigbaak an ikapitong libro sa duwang kabtang; ini na an serye nag'ingreso nin pinakadakula sa serye nin mga pelikula. An serye nagbunga man nin mga konektadong negosyo sa ibang mga paninda, na nagresulta na an marka "Harry Potter" nagkakahalaga na nin sobra sa $15 bilyon.[11]