From Wikipedia, the free encyclopedia
Si Jose "Joe" Fernando Obias (namundag, Enero 14, 1946} sarong Bikolanong edukador, historyador, peryodista asin an tagapalagdâ saka kagrogaring kan peryodikong The Paper.[1] Siya an enot na pamayo kan kasararoan na Sumaro Bikolnon. Siya man an parati kagsurat kan mga editoryal kan peryodikong Bicol Mail, asin siya an pamayong editor kan Bicol Herald. Sa Premio Tomas Arejola sa Literaturang Bikolnon 2012, siya an napiling "Masirang na Bitoon kan Literaturang Bikolnon 2012" (Lifetime Achievement Award).
Si Obias namundag sa Magarao, Camarines Sur, nagkuang elementarya sa nasabing banwaan, nagpadagos kan saiyang sekundarya sa Ateneo de Naga asin dagos luminaog sa San Jose Seminary sa Quezon City sa tuyong magpadi. Naghubo siya sa pag-adal sa Holy Rosary Minor Seminary dangan sa Holy Rosary Major Seminary kun saen nakamit niya an Batsilyer sa Pilosopiya kan taon 1971. Sa boot pang madugangan an dunong, siya nagkua sa Unibersidad nin Nueva Caceres kan kurso sa Civil Engineering na natapos niya man kan 1981. Sa tuyong mapalakbang an inadalan sa pagpadalagan nin mga eskwelahan, siya nagkua kan kursong School Administration asin Supervision sa School of Graduate Studies sa parehong unibersidad asin dai pa kontento, buminalik sa Holy Rosary Major Seminary kun saen nagkua kan kurso sa Pastoral Administration.
Siya nagtokdo nin matematiks, algebra, trigonometry, Ingles, historya, Espanyol sa haiskul, asin nagin man administrador sa manlaen-laen na katongdan: Prefect of Discipline, HS Assistant Principal, Principal, asin HS Academic Coordinator; ini saiyang nakumplihan sa iba-ibang eskwelahan arog kan Capalonga High School, Holy Rosary Major Seminary, Unibersidad kan Nueva Caceres, Pena de Francia College, asin, sa presente, sa Naga City Montessori School.
Siya nagin parasurat-bareta sa Balalong, Associate Editor kan Bikol Daily, Editor kan Bicol Star, Saligsig, Leader Vanguard, Bikol Inquirer, Vox Bikol, Bikol Standard, asin ngonyan sa Bikol Herald. Siya aktibo pa sa pagsurat nin mga editoryal sa Bicol Mail. Siya an publisher-editor kan Sanghiran y kan The Paper Newsmagazine na nag'ani nin pagpilang sa orog karahayrahay na pakasurat bilang Outstandiong Editorial, Outstanding Investigative Article, asin Outstanding News Writer kan mga taon 2002 asin 2003, hale an pagtaong pasib [2] sa St. Peter Baptist Catholic Mass Media Awards.
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.