Tangcong Vaca Guerilla Unit

An Tangcong Vaca Guerilla Unit, siring man "Tancong Vaca Guerilla Unit" (TVGU), sarong gerilyang grupo laban sa mga Hapon na pigtogdas ni Elias Madrid kan Marso 8, 1942 sa San Nicolas, Canaman, Camarines Sur. Pigpamayohan ini ninda Major Juan Q. Miranda, pamangkin ni Madrid, asin Leon Aureus na taga-Libmanan, Camarines Sur.^[1]

Monumento kan TVGU sa San Nicolas, Canaman, itinindog Marso 8, 2017

Monumento kan TVGU sa Requejo Park sa Canaman, Camarines Sur

An TVGU iyo an pinakamakusog sa mga gerilyang grupo laban sa mga Hapon sa laog nin tolong taon na mayong suporta halì sa mga Amerikano asin Filipino sundalo.^[2]

Nabawì kan grupo an kapitolyo kan Camarines Sur sa pakikipagtabangan kan iba pang gerilyang grupo asin mga agta. An pinakamatriyumpong operasyon kan grupo iyo an an pagsakyada sa Taguilid Pass sa Pamplona, Camarines Sur kan Nobyembre 1942 na 186 na mga Hapon an nagadan kaiba si Heneral Takano.

Pagromdom sa TVGU

Sarong monumento na nagtataong onra asin pagromdom an mahihiling sa Requejo Park sa Canaman, Camarines Sur.^[3] Sa San Nicolas parehong banwaan, sarong tandâ an ibinugtak kun sain namundag an gerilyang grupo.

Sa sarong makahulogan na akto, an gobyerno lokal kan barangay nin San Nicolas, Canaman nagpatindog nin sarong monumento kan Marso 8, 2017 para sa tolong mga gerilya na iyo sinda Elias Madrid, Juan Q. Miranda, asin Leon Aureus sa pagtala' sa historya bilang sinda an kagmukna kan Tangkong Vaca Guerilla Unit na mismo tinogdas sa laog kan nasabing barangay.

Tangcong Vaca

An Mt. Bernacci^[4], sarong bulod sa Libmanan, Camarines Sur, inaapod na "Tangcong Vaca" huli sa hitsura niya na kun tatanawon sa harayo garo na nakakaagid sa tangkong kan baka.