Іван Чарнякевіч

Іва́н Міха́йлавіч Чарняке́віч (нар. 1955, вёска Плябанцы Пружанскага раёну Берасьцейскай вобласьці, БССР) — беларускі мастак.

Вікіпэдыя мае артыкулы пра іншых асобаў з прозьвішчам Чарнякевіч.

Іван Чарнякевіч
Імя пры нараджэньні	Іван Міхайлавіч Чарнякевіч
Дата нараджэньня	1955(1955)
Месца нараджэньня	Плябанцы, Пружанскі раён Берасьцейскай вобласьці, БССР
Занятак	маляр

Жыцьцяпіс

Дзіцячыя гады прайшлі ў Пружанах.

У 1973 скончыў Рэспубліканскую школу-інтэрнат па музыцы і выяўленчым мастацтве (Менск), у 1981 — Вышэйшую мастацка-прамысловую вучэльню імя Мухінай(ru) у Ленінградзе. Пасьля вучобы ажаніўся з мастачкай Верай Прохаравай і застаўся ў Ленінградзе^[1].

Адзін з аснавальнікаў аб’яднаньня мастакоў-беларусаў Балтыі «Маю гонар»^[2] і Беларускага грамадзка-культурнага таварыства ў Санкт-Пецярбургу^[3]. Сябра Саюзу мастакоў Расеі (1991)^[4].

Жыве ў Санкт-Пецярбургу. З жонкай Верай Прохаравай маюць двух дзяцей.

Творчасьць

Удзельнічае ў мастацкіх выставах з 1981 року. Працуе ў тэхніцы алейнага жывапісу, габэлену і росьпісу па шоўку. Выстаўляўся ў Маскве, Санкт-Пецярбургу, Латвіі, Эстоніі, Італіі, Швайцарыі, Нідэрляндах^[1].

Працы знаходзяцца ў калекцыях Дзяржаўнага мастацкага музэю Беларусі (Менск)^[5], музэю кнігадрукаваньня Францішка Скарыны (Полацак), краязнаўчым музэі Наваградку, беларускім культурным цэнтры ў Сыднэі (Аўстралія), Расейскім культурным цэнтры ў Сэуле (Карэя), Вайскова-касьмічнай акадэміі імя Мажайскага(ru) ў Санкт-Пецярбургу (Расея), у прыватных зборах у ЗША, Італіі, Нідэрляндах, Расеі, Францыі.

У гонар 580-годзьдзя Пружанаў і 20-годзьдзя «Палацыку» мастак падараваў пружанскаму музэю тры свае карціны «Жанчыны Палесься. Фота пачатку XX стагодзьдзя», «Песьня» ды «Сусьвет»^[6].