Беларуская фэдэрацыя гандболу

Беларуская фэдэрацыя гандболу — спартовае грамадзкае аб’яднаньне Беларусі, заснаванае ў 1992 годзе.

Беларуская фэдэрацыя гандболу
Абрэвіятура	БФГ
Дата ўтварэньня	1992 (33 гады таму)
Тып	спартовае
Юрыдычны статус	грамадзкае аб’яднаньне
Мэта	ладжаньне спаборніцтваў па гандболе
Штаб-кватэра	Першамайскі раён, вуліца Сурганава, дом 2[1]
Месцазнаходжаньне	Менск
Каардынаты	53°55′3″ пн. ш. 27°36′17″ у. д.
Дзейнічае ў рэгіёнах	Беларусь
Сяброўства	Нацыянальны алімпійскі камітэт Беларусі
Афіцыйныя мовы	беларуская, расейская
Генэральны сакратар	Андрэй Балецкі
Старшыня	Уладзімер Канаплёў
Намесьнікі	Юры Цярэшчанкаў, Андрэй Барбашынскі, Сяргей Рэпкін, Віталь Сурыновіч, Міхаіл Маеўскі, Натальля Карпіловіч
Галоўны трэнэр зборнай	Юры Шаўцоў
Старшыня спаборніцкай камісіі	Сяргей Кот
Асноўныя асобы	Ігар Папруга (галоўны трэнэр жаночай зборнай)[2]
Кіроўны орган	Выканаўчы камітэт
Колькасьць супрацоўнікаў	18 (2025 год)[3]
Сайт	handball.by

На 2025 год налічвала 33 гульнявыя судзьдзі, у тым ліку 5 жанчынаў^[4], а таксама 19 інспэктараў, у тым ліку адну жанчыну^[5]. На міжнародных пяршынствах ад Беларусі выступалі 4 зборныя: жаночая і мужчынская, дзяўчынаў і юнакоў да 19 гадоў^[6].

Спаборніцтвы

На 2025 год Беларуская фэдэрацыя гандболу ладзіла:

• Супэрлігу Беларусі сярод жанчынаў і мужчынаў асобна ў 1-м і 2-м дывізіёнах у абодвух выпадках^[7];
• Кубак Беларусі сярод жанчынаў і мужчынаў асобна зь фіналам чатырох у абодвух выпадках^[8];
• Супэркубак Беларусі сярод жанчынаў і мужчынаў асобна^[9].

У спаборніцтвах бралі ўдзел:

• 14 жаночых дружынаў — «БНТУ-БелАЗ», «БНТУ-БелАЗ-РГУАР», «БНТУ-БелАЗ-2», «Гомель», «Гомель-2», «Гараднічанка» (Горадня), «Гараднічанка-2», «Берасьце», «Берасьце-2», «Бярэзіна» (Бабруйск), «Віцяблянка», «Зорка», «Зорка-2» і «РГУАР-Зборная-2008»;
• 18 мужчынскіх дружынаў — «Мяшкоў Берасьце», «СКА Менск», «БДУФК-СКА-РГУАР», «СКА-Юні», «Кронан» (Горадня), «Кронан-2», «Бусел Кітаю», «Машэка» (Магілёў), «Машэка-2», «Гомель», «Гомель-2», «Менскі абласны гандбольны клюб», «РЦАР-МАГК», «Аматары», «СДЮШАР-Вікторыя», «МАЗ-Ворша», «СДЮШАР-Вікторыя» і «РГУАР-Зборная-2008».

Кіраваньне

• Канфэрэнцыя. Паўнамоцная пры ўдзеле 2/3 пасланьнікаў. Зацьвярджала Праграму разьвіцьця гандболу ды абірала Выканаўчы камітэт, Кантрольна-рэвізійную камісію і Апякунскую раду на 4 гады. Прымае рашэньне аб удзеле ў саюзах грамадзкіх аб’яднаньняў.
• Выканаўчы камітэт. Улучала старшыню, ягоных намесьнікаў, генэральнага сакратара, кіраўнікоў пастаянных камісіяў і кіраўнікоў абласных ды менскага гарадзкога аддзяленьняў БГФ. Зацьвярджаў каштарыс выдаткаў і гадавы плян працы. Вызначаў памер сяброўскіх унёскаў і ствараў гаспадарчыя ўстановы.
• Апарат. Яго кіраўнік прызначаўся старшынёй. Вёў пратакол паседжаньняў і выконваў даручэньні Выканаўчага камітэту. Складаў гадавы плян мерапрыемстваў і справаздачы ў Міністэрства спорту і турызму Беларусі, Міністэрства юстыцыі Беларусі і Нацыянальны алімпійскі камітэт Беларусі.
• Кантрольна-рэвізійная камісія. Засядала штогод. Улучала ўласнага старшыню, ягонага намесьніка і сакратара. Ладзіла праверкі гаспадарчай дзейнасьці і справаводзтва, стану банкаўскіх рахункаў і выкананьнем каштарысу.
• Апякунская рада. Складалася з дарадцаў старшыні^[10].

Мінуўшчына

У 1992 годзе заснавалі грамадзкае аб’яднаньне «Беларуская фэдэрацыя гандболу», якое стварыла штогадовы Чэмпіянат Беларусі па гандболе сярод мужчынаў. У 1995 годзе мужчынская зборная Беларусі па гандболе ўпершыню выйшла ў фінал Чэмпіянату сьвету па гандболе, дзе заняла 5-е месца. У 1997 і 1999 гадох жаночая зборная Беларусі па гандболе выходзіла ў фінал Чэмпіянату сьвету па гандболе. У 2000 годзе юнацкая зборная Беларусі па гандболе заняла прызавое 2-е месца на Моладзевым чэмпіянаце Эўропы па гандболе, які праходзіў у Грэцыі. Капітан юнацкай зборнай Андрэй Курчаў атрымаў узнагароду найлепшага гульца, бамбардзіра і правага паўсярэдняга. Іван Броўка і Аляксей Жук атрымалі ўзнагароды найлепшых левага крайняга нападніка і брамніка адпаведна. Старэйшым трэнэрам быў Мікалай Жук^[11].

У 2013 годзе 6-кратны пераможца Лігі чэмпіёнаў ЭГФ Сяргей Рутэнка быў прызнаны найлепшым левым паўсярэднім сьвету. У 2015 годзе моладзевая зборная Беларусі па гандболе заняла 6-е месца на чэмпіянаце сьвету, які праходзіў у Бразыліі. Трэнэрамі былі Алег Шарэйка, Сяргей Кастрама і Мікалай Зянько. У 2016 годзе брамнік Вячаслаў Салдаценка быў прызнаны найлепшым брамніка сьвету. У 2020 годзе Мікалай Вайлупаў стаў 2-м бамбардзірам Чэмпіянату Эўропы. У 2022 годзе Арцём Каралёк прызнаваўся найбольш каштоўным гульцом фіналу Лігі чэмпіёнаў Эўрапейскай гандбольнай фэдэрацыі^[11].

Старшыні

• Юры Кулакоўскі (2001—2006)
• Уладзімер Канаплёў (ад 2006 году)