Будзьма беларусамі (мультфільм)

«Будзьма беларусамі» — першы прафэсійна зроблены^[1][2][3] анімацыйны фільм беларускай мовай, прысьвечаны гісторыі Беларусі ад «пачатку часоў» да 1991 году. Мультфільм зьяўляецца цэнтральным прадуктам праекту «БудзьмаTUT» культурніцкай кампаніі «Будзьма беларусамі!». Аўтары ідэі твору — кампанія «Будзьма беларусамі!» і Юлія Ляшкевіч, мастак-аніматар — Юлія Рудніцкая, аўтар тэксту — Лявон Вольскі, вакал — Аляксандар Памідораў.

Будзьма беларусамі!
Кадр з мультфільму
Тып мультфільму	анімацыйны фільм
Рэжысэр	Юлія Рудзіцкая
Аўтар сцэнару	кампанія «Будзьма беларусамі!»
Ролі агучвалі	Аляксандар Памідораў, Лявон Вольскі
Кампазытар	Лявон Вольскі
Аніматары	Юлія Рудзіцкая
Краіна	Беларусь
Працягласьць	5:37
Прэм’ера	28 траўня 2011

Афіцыйна абвешчаная мэта праекту — зацікавіць шырокае кола гледачоў гісторыяй і культурай беларускага народу. Тэкст анімацыйнага фільму апісвае асноўныя падзеі ў гісторыі беларускай дзяржаўнасьці і беларусаў і выкананы з элемэнтамі гіп-гопу^[1].

Пасьля афіцыйнага выхаду 28 траўня 2011 году за некалькі дзён мультфільм увайшоў у дзясятку рэйтынгу сайту YouTube сярод ролікаў, што абмяркоўваліся ў сьвеце найбольш, у топ-100 найбольш прагляданых ролікаў у Чэхіі і Польшчы, а таксама трапіў у тройку найлепшых на Яндэкс-відэа^[4]. Цягам 10 дзён пасьля прэзэнтацыі ролік на YouTube паглядзелі больш за 110 тысячаў разоў^[5]. Паводле ацэнкі Юліі Сакаловай, экспэрта кампаніі «Адкрытыя сацыяльныя мэдыі», агулам за няпоўны тыдзень пасьля рэлізу ролік прагледелі больш за 350 тысячаў чалавек, 66% зь якіх знаходзіліся на тэрыторыі Беларусі^[4].