ВИА Гра

ВИА Гра — украінскі жаночы поп-гурт, утвораны ў 2000 годзе ў Кіеве. Калектыў лічыцца адным з самых пасьпяховых расейскамоўных музычных праектаў 2000-х гадоў^[1]. Гурт запісаў 5 студыйных альбомаў: 3 зь іх атрымалі залаты статус у Расеі, 1 англамоўны альбом атрымаў плятынавы статус у Тайляндзе ды залаты ў некаторых іншых азіяцкіх краінах^[2]; выпусьціў больш за 30 радыёсынглаў ды відэакліпаў. «ВИА Гра» зьяўляецца ляўрэатам мноства музыкальных прэмій, такіх як «Залаты дыск», «Залаты грамафон», «Прэмія Муз-ТВ» ды іншых.

ВИА Гра
Гады	2000—сёньняшні дзень
Краіна	Украіна
Месца ўтварэньня	Украіна
Мова	расейская
Жанр	поп-музыка эўрапоп эўрадэнс дэнс-поп Adult contemporary
Выдавец	«Sony Music Entertainment» (2001—2004), «Меладзе-Бразерс» (2004-2008), «Константа Рекордз» (2008-2012) «Velvet Music» (2012-цяпер)
Удзельнікі	гурту Д. Касьцюка: Дар’я Растова Алена Таўстаногава Ірына Астроўская гурту К. Меладзэ: Эрiка Герцег Анастасія Кажэўнікава Міша Раманова
Былыя ўдзельнікі	Тацяна Бужилава · Ганна Седакова · Вера Брэжнева · Тацяна Котава · Сьвятлана Лабада

У калектыве часта зьмяняюцца ўдзельнікі, што можа сьведчыць пра тое, што гурт зьяўляецца камэрцыйным прадусарскім праектам. Музычны прадусар гурту — кампазытар Канстанцін Меладзэ. Гурт заснаваў украінскі бізнэсмэн Дзьмітры Касюк, які быў генэральным прадусарам праекту да 2011 году^[3].

Найбольшай папулярнасьці гурт дабіўся ў 2003 годзе, калі «ВИА Гра» складалася з Ганны Седаковай, Надзеі Граноўскай ды Веры Брэжневай. Журналісты ды прыхільнікі калектыву традыцыйна называюць гэты склад «залатым» — пад гэтым разумеюць, што гэты склад быў «клясычным», самым моцным на думку музыкальных крытыкаў, папулярным ды творча пладавітым.

Назва гурту — алюзія на лекі «Віягра» і расшыфроўваецца як ВІА — вакальна-інструмэнтальны ансамбль; укр. гра — гульня. У 2003 годзе, выпусьціўшы дэбютны англамоўны альбом з назвай «V.I.A. „Gra“» і атрымаўшы пагрозу судовай позвы ад вытворцы прэпарату, кіраўніціва Sony Music дало гурту псэўданім «Nu Virgos»^[1].