Добраахвотнае таварыства садзейнічаньня арміі, авіяцыі і флёту Рэспублікі Беларусь

Добраахвотнае таварыства садзейнічаньня арміі, авіяцыі і флёту Рэспублікі Беларусь — абаронна-спартовае грамадзкае аб’яднаньне Беларусі, заснаванае ў 1991 годзе.

Добраахвотнае таварыства садзейнічаньня арміі, авіяцыі і флёту Беларусі
Абрэвіятура	ДТСААФ РБ
Дата ўтварэньня	16 кастрычніка 1991 (33 гады таму)
Тып	спартовае
Юрыдычны статус	грамадзкае аб’яднаньне
Мэта	спрыяньне ўмацаваньню абароны Беларусі
Штаб-кватэра	Кастрычніцкі раён, Аэрадромная вул., д. 3а[1]
Месцазнаходжаньне	Менск
Каардынаты	53°52′27″ пн. ш. 27°32′13″ у. д.
Дзейнічае ў рэгіёнах	Беларусь
Сяброўства	РКРКППГА
Афіцыйныя мовы	беларуская, расейская
Старшыня	Андрэй Некрашэвіч
Намесьнікі	Тацяна Губаныч, Алег Бурак, Ігар Кузьмук, Георгі Кудраўцаў[2]
Кіроўны орган	Рада
Бюджэт	14 269 млн рублёў[3] (2011; 2545 тыс. $[4])
Колькасьць супрацоўнікаў	2800 (2025 год)
Колькасьць валянтэраў	180 тыс. (2025 год)
Сайт	beldosaaf.by/be
Колішняя назва	Беларускае абароннае спартова-тэхнічнае таварыства (да 20 жніўня 2003 году)

На 2025 год рыхтавала аўтакіроўцаў і разьвівала авіяцыйныя і тэхнічныя віды спорту ў Беларусі. Сярод іншага, ДТСААФ Беларусі навучала адмыслоўцаў для Ўзброеных сілаў Беларусі^[5].

Будова

На 2025 год Добраахвотнае таварыства садзейнічаньня арміі, авіяцыі і флёту Беларусі мела звыш 180 000 сябраў у складзе больш як 2200 суполак у 93 раённых установах. На ДТСААФ Беларусі працавала звыш 2800 супрацоўнікаў^[5]. У склад Таварыства ўваходзілі:

• 5 аэраклюбаў — Бабруйскі (Сычкава), Берасьцейскі (Міхалін), Віцебскі (Новакукавячына, Ноўкінскі сельсавет), Магілёўскі (Новае Пашкава) і Менскі (Ліпкі ў Партызанскім раёне і Хажова пад Мойсічамі);
• 5 дзіцяча-юнацкіх спартова-тэхнічных школ — водных відаў спорту (Менск, вул. Ігнаценкі, д. 7), Наваполацкая водных відаў спорту (падводны і мотабол), радыёспорту (Менск, вул. Кульман, д. 15), стралковага спорту (вул. Сямашкі, д. 15) і мотаспорту (з аддзяленьнямі ў Ашмянах, Воршы, Нясьвіжы і Слуцку)^[6];
• 5 гасьцініцаў-інтэрнатаў;
• 2 асяродкі павышэньня кваліфікацыі кіраўнікоў і адмыслоўцаў;
• аўтамабільная школа (Менск, Камсамольская вул., д. 11) і стралкова-спартовы-клюб (Менск, Даўгабродзкая вул., д. 75)^[5].

ДТСААФ Беларусі мела 1755 транспартных сродкаў:

• 825 легкавікоў, зь іх 747 навучальных;
• 356 цяжкавікоў, зь іх 300 навучальных;
• 246 прычэпаў і паўпрычэпаў;
• 205 матацыклаў;
• 111 аўтобусаў, зь іх 86 навучальных;
• 76 паветраных суднаў;
• 58 адмысловых самаходаў, зь іх 3 навучальныя;
• 24 трактары^[5].

Для навучаньня прапаноўвалі:

• 440 тэарэтычных і 48 кампутарных клясаў;
• 129 аўтадромаў;
• 79 лябараторыяў;
• 6 мотабольных палёў;
• 4 тэхнічныя стадыёны;
• мотакросавую трасу^[5].

Кіраваньне

• Зьезд. Склікаецца аднойчы на 5 гадоў. Правамоцны пры наяўнасьці 2/3 прадстаўнікоў. Абірае Раду і Рэвізійную камісію.
• Рада. Абірае старшыню і Прэзыдыюм.
• Прэзыдыюм. Кіруе дзейнасьцю супрацоўнікаў.
• Рэвізійная камісія. Назірае за дзейнасьцю ўстановаў таварыства.

Задачы

Паводле Статуту задачамі таварыства ёсьць:

• падрыхтоўка насельніцтва да абароны;
• разьвіцьцё тэхнічных, авіяцыйных, ваенна-прыкладных гульняў і тэхнічнай творчасьці моладзі;
• садзейнічаньне патрыятычнаму выхаваньню;
• падрыхтоўка моладзі да вайсковай службы і працы;
• платная падрыхтоўка адмыслоўцаў на замову Міністэрства абароны, іншых дзяржаўных установаў, дзе прадугледжваецца вайсковая служба, для Ўзброеных сілаў, іншых войскаў і воінскіх утварэньняў;
• лётнае навучаньне курсантаў авіяцыйнага факультэту Вайсковай акадэміі Рэспублікі Беларусь;
• падрыхтоўка ваенна-тэхнічных адмыслоўцаў;
• ваеннае навучаньне насельніцтва.

Мінуўшчына

З 2004 году Добраахвотнае таварыства садзейнічаньня арміі, авіяцыі і флёту Беларусі брало ўдзел у Рэспубліканскай каардынацыйнай радзе кіраўнікоў палітычных партыяў і грамадзкіх аб’яднаньняў^[7]. З 23 траўня 2007 году пасаду старшыні займаў Анатоль Сьцяпук. Ад 2008 год штогод рыхтавала траціну новых аўтакіроўцаў краіны^[8][9]. На 2012 год мела ва ўласнасьці 27 аўташколаў, 5 аэраклюбаў, 3 спартовыя комплексы, 4 стралковыя клюбы і 5 спэцыялізаваных дзіцяча-юнацкіх спартова-тэхнічных школаў^[10]. Налічвала 110 тыс. сябраў.

За 2013 год Добраахвотнае таварыства садзейнічаньня арміі, авіяцыі і флёту Беларусі атрымала даход у 262 млрд рублёў (27,5 млн даляраў). На 2014 год ДТСААФ Беларусі налічвала звыш 115 000 чалавек і разьвівала 19 тэхнічных, авіяцыйных і вайскова-дастасоўных відаў спорту. Сярод іншага, рыхтавала запас спартоўцаў для зборных дружынаў Беларусі ў 5 дзіцяча-юнацкіх спартова-тэхнічных школах^[11].