Манумэнт Незалежнасьці

Манумэ́нт Незале́жнасьці (па-ўкраінску: Монумент Незалежності) — помнік, прысьвечаны незалежнасьці Ўкраіны. Манумэнт разьмешчаны ў цэнтры Кіева на майдане Незалежнасьці.

Манумэнт
Манумэнт Незалежнасьці Монумент Незалежності
Краіна	Украіна
Горад	Кіеў
Каардынаты	50°26′58″ пн. ш. 30°31′31″ у. д.
Архітэктурны стыль	украінскае барока[d]
Аўтар праекту	Анатоль Кушч
Будаваньне	2000—2001 гады
Манумэнт Незалежнасьці на мапе Ўкраіны Манумэнт Незалежнасьці
Манумэнт Незалежнасьці на Вікісховішчы

Манумэнт стылістычна ўяўляе сабой сумесь ўкраінскага барока і ампіру. Манумэнт узьведзены ў кампазыцыйным цэнтры Майдану Незалежнасьці ў Кіеве ў гонар 10-годьдзя незалежнасьці Ўкраіны ў 2001 годзе^[1]. Уяўляе сабой 52-мэтровую калёну, увянчаную фігурай жанчыны (Берагіні) з калінавай галінкай у руках. Агульная вышыня — 61 мэтар. У якасьці мадэлі для статуі Берагіні аўтар Анатоль Кушч выбраў сваю дачку, мастачку Хрысьціну Катракіс.

Калёна, абліцаваная белым італьянскім мармурам стаіць на пастамэнце ў выглядзе хрысьціянскага храму ў стылі ўкраінскага барока. На калёне стаіць статуя дзяўчыны, апранутай ва ўкраінскі нацыянальны строй, якая трымае ў руках калінавую галінку. Асобныя элемэнты скульптуры — калінавая галінка, арнамэнт на вопратцы і стужкі вянку пакрытыя золатам. Маса скульптуры зь літой бронзы — каля 20 тонаў.

Для забесьпячэньня бясьпекі манумэнту пры любых магчымых прыродных катаклізмах інжынэры пры будаўніцтве статуі выкарыстоўвалі тэхнічныя мэханізмы падобныя з тымі, што выкарыстоўваліся ў манумэнце Радзіма-Маці. Каб з-за ветравых нагрузак або з прычыны землятрусу не парушылася ўстойлівасьць скульптуры, пад ёй у сярэдзіне калёны падвешаны своеасаблівы ківач вагой паўтары тоны, які гасіць хістаньні, калі яна падвяргаецца вонкаваму ўзьдзеяньню.