Менскае пагадненьне (2014)

Ме́нскі пратакол — пагадненьне пра спыненьне агню паміж урадамі Ўкраіны і Расейскай Фэдэрацыі ад 5 верасьня 2014 году пры пасярэдніцтве Арганізацыі бясьпекі і супрацы ў Эўропы, што забавязалася назіраць за неўжываньнем зброі. Складаўся з 12 пунктаў, у тым ліку ўлучаў абмен палоннымі, вывад з Украіны расейскіх вайсковых злучэньняў і ўзбраеньня разам з баевікамі і наймітамі ды амністыю расейскіх пасобнікаў. Уступіў у сілу ў той жа дзень з 18:00 паводле менскага часу^[1]. Акрамя ўдзельнікаў Трохбаковай кантактнай групы(en), без пазначэньня прыналежнасьці пад подпісам расейскага амбасадара^[2] ўласныя подпісы паставілі Аляксандар Захарчанка і Ігар Платніцкі^[3][4], якія бралі ўдзел у кіраваных расейскімі дывэрсантамі^[5] тэрарыстычных арганізацыях «Данецкая» і «Луганская народныя рэспублікі»^[3].

Менскі пратакол
Пратакол па выніках кансультацыяў Трохбаковай кантактнай групы адносна сумесных крокаў, накіраваных на імплемэнтацыю мірнага пляну
Тып дамовы	пагадненьне пра спыненьне агню
Падрыхтаваная	1 верасьня 2014
Падпісаная	5 верасьня 2014
·  месца	Менск
Набыла моц	5 верасьня 2014
·  умовы	Вызваленьне закладнікаў; вывад з Украіны расейскіх вайсковых злучэньняў і ўзбраеньня, таксама баевікоў і наймітаў; амністыя расейскіх пасобнікаў
Тэрмін дзеяньня	бестэрміновы
Падпісанты	Гайдзі Тальявіні (пасярэднік), Леанід Кучма, Міхаіл Зурабаў
Бакі	(АБСЭ) Украіна, Расея
Статус	дзейны
Мова	расейская

Пра пагадненьні 2014 году глядзіце артыкул Менскія пагадненьні (2015).

Пра абагулены прадмет артыкула глядзіце артыкул Менскія пагадненьні.

19 верасьня 2014 г. у Менску падпісалі Мэмарандум аб выкананьні палажэньняў Пратаколу ад 5 верасьня, што складаўся зь 9 пунктаў. Спыненьне вайсковых падразьдзяленьняў бакоў абвяшчалася на лініі іх судакрананьня па зьмененым стане на 19 верасьня ў сувязі з парушэньнем спыненьня агню. Цягам наступных сутак (20 верасьня) прадугледжваўся адвод гарматаў калібрам звыш 100 мілімэтраў ад лініі судакрананьня на 15 кілямэтраў і разьмяшчэньне ў гэтай паласе агульнай шырынёй 30 км назіральнікаў АБСЭ. Таксама ў межах паласы адводу гарматаў прадугледжвалася спыненьне вайсковых палётаў і ўстаноўкі мінаў^[6]. У 4-ым пункце адмыслова ўдакладняўся адвод гарматаў на адлегасьць іх найбольш далёкай стральбы. У тым ліку згадвалася рэактыўная сыстэма залпавага агню(en) (РСЗА) «Тарнада»(en), што стаяла на ўзбраеньні выключна расейскага войска («Тарнада-Г»(ru))^[7].

Удзельнікі кантактнай групы

• АБСЭ: Гайдзі Тальявіні(en), прадстаўніца старшыні АБСЭ па пытаньнях урэгуляваньня сытуацыі ва Ўкраіне^[8] (швайцарскі дыплямат).
• Украіна: Леанід Кучма^[3], упаўнаважаны прадстаўнік прэзыдэнта Ўкраіны (былы прэзыдэнт Украіны).
• Расея: Міхаіл Зурабаў^[3], упаўнаважаны прадстаўнік прэзыдэнта Расеі і амбасадар Расеі ва Ўкраіне.

Склад пратаколу

1. Забясьпечыць неадкладнае двухбаковае спыненьне прымяненьня зброі.
2. Забясьпечыць маніторынг і вэрыфікацыю з боку АБСЭ рэжыму неўжываньня зброі.
3. Ажыцьцявіць дэцэнтралізацыю ўлады, у тым ліку шляхам прыняцьця Закона Ўкраіны «Аб часовым парадку мясцовага самакіраваньня ў асобных раёнах Данецкай і Луганскай абласьцей» (Закон аб асаблівым статусе).
4. Забясьпечыць пастаянны маніторынг на расейска-ўкраінскай дзяржаўнай граніцы і вэрыфікацыю з боку АБСЭ са стварэньнем зоны бясьпекі ў памежных раёнах Украіны і Расейскай Фэдэрацыі.
5. Неадкладна вызваліць усіх закладнікаў і асобаў, якія незаконна ўтрымліваюцца.
6. Прыняць закон аб недапушчэньні перасьледу і пакараньня асобаў у сувязі з падзеямі, якія адбыліся ў асобных раёнах Данецкай і Луганскай абласьцях Украіны.
7. Працягнуць інклюзіўны агульнанацыянальны дыялёг.
8. Прыняць меры дзеля паляпшэньня гуманітарнай сытуацыі на Данбасе.
9. Забясьпечыць правядзеньне датэрміновых мясцовых выбараў у адпаведнасьці з Законам Украіны «Аб часовым парадку мясцовага самакіраваньня ў асобных раёнах Данецкай і Луганскай абласьцей» (Закон аб асаблівым статусе).
10. Вывесьці незаконныя ўзброеныя фармаваньні, вайсковую тэхніку, а таксама баевікоў і наймітаў з тэрыторыі Ўкраіны.
11. Прыняць праграму эканамічнага адраджэньня Данбасу і аднаўленьня жыцьцядзейнасьці рэгіёну.
12. Прадаставіць гарантыі асабістай бясьпекі для ўдзельнікаў кансультацыяў^[9].

Вынікі

5 верасьня а 18-й гадзіне набыў моц рэжым спыненьня агню на ўсходзе Ўкраіны, аднак пасьля гэтага абодва бакі неаднакроць абвінавачвалі адзін аднаго ў ягоным парушэньні^[10][11].

Глядзіце таксама

• Менскія пагадненьні (2015)
• Наварасея