Садъ

«Садъ» (па-беларуску: Сад) — беларускі музычны гурт зь Берасьця, створаны ў 1990 року. Выконвае песьні па-расейску.

Садъ
Гады	1990 — цяпер
Краіна	СССР Беларусь
Месца ўтварэньня	Берасьце
Мова	расейская
Жанр	рок
Удзельнікі	Уладзімер Серафімаў Аляксандар Катовіч Натальля Руцкая Вадзім Карпук Аляксей Кузьняцоў Андрэй Бобрык
Былыя ўдзельнікі	Аляксей Казлоў Анатоль Харытонаў Віталь Кунц Марына Карпук

Мінуўшчына

Дэбютны альбом («Меланхолия») гурту ў складзе Ўладзімера Серафімава, Віталя Кунца, Анатоля Харытонава быў запісаны ў 1990 року. Пасьля гэтага гурт атрымаў запрашэньне на магілёўскі фэст «Будь спок!»-1991, сярод удзельнікаў якога быў і «Нейро Дюбель»^[1]. Паводле згадак аднаго з арганізатараў фэсту Юрыя Раманава, «Садъ» стаў тады галоўным правалам «Будь спока!» з прычыны адсутнасьці клявішных, драм-машынкі і гуку астатніх інструмэнтаў удзельнікаў гурту^[2]

На той жа студыі ў Берасьцейскім пэдагагічным інстытуце былі запісаныя яшчэ два неафіцыйныя альбомы («Вивисекция» і «Садъ и змей»). Афіцыйна песьні тых гадоў былі перавыдадзеныя пазьней у альбоме пад назвай «Меланхоличный садъизм»^[3], хоць часта рокам ягонага выхаду пазначаецца 1990^[4].

Канцэрт гурту «САДЪ» у музэі-сядзібе «Пружанскі палацык», 2009

У 1995 року на студыі «Грын-Хаўс» у Берасьцейскім парку імя Першага траўня былі запісаныя альбомы «Помойка» і «Чай хана…».

У 1996 року да гурту далучыўся Аляксей Казлоў. У наступным року на фірме «Вігма» выдадзеная кампакт-касэта «Мы пред врагом не спустили».

У 1998 року гурт узяў удзел ва ўсерасейскім рок-фэсьце «Rock-Line(ru)» (Кунгур), дзе заняў першае месца з 226 удзельнікаў^[5]. Запісаны альбом «С котом по эту сторону окна». Склад «Саду» папоўніла Марына Карпук.

У 1999 замест Аляксея Казлова зьявіўся Аляксандар Катовіч. Выдадзены альбом «Зоосадъ».

У 2000 запісаны альбом «Перекурчик в деревенском кабаре».

У 2004 у Расеі выйшаў чарговы альбом «Паутинка в небо», які атрымаў перавыданьне і шырокае прызнаньне. Гурт пачаў зьяўляцца на радыё і тэлебачаньні, на песьні альбому былі зьнятыя кліпы. Цераз год у Маскве пачалося перавыданьне ўсяе дыскаграфіі «Саду», выдадзены канцэртны альбом «Да пришли вы все…».

У 2008 року гурт «Садъ» узяў удзел у фэсьце «Рок-каранацыя» ў Маладэчне^[6].

У 2011 року выйшаў альбом «Баллада о гордом рыцаре», у 2012 — альбом «Чистый керосинъ»^[7].

У ліпені 2017 року быў прэзэнтаваны альбом «Абсентъ». У 2019 выйшаў альбом «Ещё раз про любовь».

Стыль

Музычны стыль гурту адныя крытыкі называюць сумесьсю гранжу, фолку і рэгі^[5], іншыя ж чуюць у музыцы «Саду» элемэнты панку, арт-року, джазу і савецкай эстрады^[3], трэція лічаць, што стыль гурту ўнікальны і не падддаецца азначэньню. Паводле вызначэньня саміх удзельнікаў гурту, іхні стыль музыкі завецца «этнепанк» (ад рас. это не панк — гэта ня панк)^[3]. На канцэртах удзельнікі гурты задзейнічаюць гітару, бас, акардэон, флейту, ударныя. Падчас запісу альбомаў да іх могуць дадавацца скрыпка, віялянчэль, бонгі, тамбурын, балалайка, труба, гелікон і саксафон^[5].

Склад

• Уладзімер Серафімаў — музыка, тэксты, гітара, сьпеў
• Аляксандар Катовіч — акардэон^[3]
• Натальля Руцкая — скрыпка
• Вадзім Карпук — валторна
• Аляксей Кузьняцоў — бубны
• Андрэй Бобрык — бас-гітара

Былыя ўдзельнікі

• Аляксей Казлоў — акардэон, трамбон
• Анатоль Харытонаў — бас-гітара, клявішныя, аранжыраваньне, гукарэжысура
• Віталь Кунц — бубны
• Марына Карпук — флейта

Дыскаграфія

• «Меланхолия» (1990)^[3]
• «Вивисекция» (1990)^[3]
• «Садъ и змей» (1990)^[3]
• «МеланхоЛИЧНЫЙ САДЪизм» (1992)
• «Помойка» (1995)^[8]
• «Чай хана…»^[3] (1996)^[9]
• «Мы пред врагом не спустили» (1997)^[10]
• «С котом по эту сторону окна» (1998)^[11]
• «Зоосадъ» (1999)^[12]
• «Перекурчик в деревенском кабаре» (2000)^[13]
• «Лучшие Садъовые песни (2002)»^[5]
• «Паутинка в небо» (2004)^[14]
• «Да пришли вы все…» (2005, канцэртны запіс)^[15]
• «МеланхоЛИЧНЫЙ САДЪизм»^[4] (2006)^[16]
• «Билетик» («Слон на ромашке», 2009)^[17]
• «Баллада о гордом рыцаре» (2011)^[18]
• «Чистый керосинъ» (2012)^[7]
• «Лучшие Садъовые песни (2012)»^[19]
• «Опусы от Леща Васи» (2014)
• «Абсентъ» (2017)
• «Ещё раз про любовь» (2019)