Скейтбордынг

Скейтбо́рдынг — від спорту, які ўключае ў сябе катаньне і выкананьне трукаў з выкарыстаннем скейтборда, а таксама забаўляльная дзейнасьць, від мастацтва, праца ў індустрыі забаваў і спосаб перамяшчэньня^[1][2]. Скейтбордынг узьнік у ЗША, але прайшло шмат гадоў пакуль ён не сфармаваўся як віду спорту. Справаздача 2009 году выявіла, што рынак скейтбордынгу ацэньваецца ў 4,8 мільярды даляраў ЗША гадавога прыбытку, а актыўных скейтбардыстаў у сьвеце на той час налічвалася блізу 11 мільёнаў чалавек^[3]. У 2016 годзе было абвешчана, што скейтбордынг будзе прадстаўлены на летніх Алімпійскіх гульнях 2020 году ў Токіё з дысцыплінамі як для мужчынаў, гэтак і для жанчынаў^[4].

Скейтбардыстка выконвае трук.

З 1970-х гадоў пачалі будавацца адмысловыя скейтпаркі, якія выкарыстоўваюцца скейтбардыстамі, фрыстайлістамі BMX і, у апошні час, аматарамі самакатаў. Тым ня менш, скейтбордынг мае і нэгатыўныя наступствы, бо часам ягоныя аматары псуюць крайкі, прыступкі, лаўкі, пляцы і паркі^[1][5].