Тутсі

Ту́тсі (на руандзе: Tutsi) — этнічная група ў рэгіёне Вялікіх Афрыканскіх азёраў. Адносяцца да моўнай групы банту^[1]. У асноўным жывуць у Руандзе і Бурундзі, дзе фармуюць другую паводле колькасьці этнічную групу пасьля хуту, якія дамінуюць у абодвух памянёных дзяржавах^[2]. Гістарычна склалася, што тутсі гадавалі быдла, а таксама зь іх традыцыйна фармаваліся войскі. Да 1962 году на тутсі абапіралася бэльгійская каляніяльная адміністрацыя, то бок кароль Руанды паходзіў з тутсі, гэтак жа як шляхестцва таксама складалася з прадстаўнікоў тутсі^[2]. Хуту фактычна падпарадкоўваліся тутсі. Па здабыцьці незалежнасьці Руанды ўладу атрымалі хуту, якія ў 1994 годзе ўчынілі генацыд тутсі. Пасьля перамогі Руандыйскага патрыятычнага фронту ў грамадзянскай вайне ў Руандзе палітыка ў дзяржаве скіравалася на замірэньне хуту і тутсі, а таксама ліквідаваньне этнічных канфліктаў.

Тутсі
Tutsi
1904
Агульная колькасьць	3 млн чалавек
Рэгіёны пражываньня	Бурундзі, Руанда, Дэмакратычная Рэспубліка Конга
Мовы	руанда, кірундзі, француская, ангельская, суахілі
Рэлігіі	хрысьціянства (80%), іслам (5%)
Блізкія этнасы	хуту, тва
Тутсі ў Вікісховішчы