Царква Сьвятога Мікалая (Пральнікі)

Царква Сьвятога Мікалая — праваслаўны храм у в. Пральнікі Валожынскага раёну Менскай вобласьці.

Гэтая назва мае некалькі сэнсаў. Калі вас цікавяць іншыя сэнсы, глядзіце таксама Царква Сьвятога Мікалая.

храм
Царква Сьвятога Мікалая Храм сьвяціцеля Мікалая Цудатворца
Краіна	Беларусь
Вёска	Пральнікі
Каардынаты	53°56′37.1″ пн. ш. 26°51′12.54″ у. д.
Канфэсія	праваслаўе
Эпархія	Маладэчанская
Тып будынка	ратонда, капліца-пахавальня
Архітэктурны стыль	клясыцызм
Будаваньне	XIX стагодзьдзе—???
Дата скасаваньня	1961
Статус	помнік архітэктуры
Стан	дзейны
Царква Сьвятога Мікалая на мапе Беларусі Царква Сьвятога Мікалая
Царква Сьвятога Мікалая на Вікісховішчы

Гісторыя

Знаходзіцца ў цэнтры вёскі, на могілках. Пабудавана ў першай палове 19 ст. з цэглы і бутавага каменю як каталіцкая капліца-пахавальня ўладальнікаў маёнтку. З 1866 году — праваслаўная царква, у 1920-я гады вернутая католікам, напрыканцы 20 стагодзьдзя зноў перададзена праваслаўным.

Архітэктура

Помнік архітэктуры позьняга клясыцызму. Вырашана ў форме купальнай ратонды з масіўнай глухой атынкаванай сьцяной (таўшчыня 1,5 м) і кананічным дахам з макаўкай у завяршэньні. Уваход вылучаны чатырохслуповай аркадай з трохвугольным франтонам. Плоскасная сьцяна крапавана цокалем і падкарнізнай цягай.

Інтэр'ер

Прастора інтэр'еру вырашана адзіным цыліндрычным аб’ёмам, перакрытым сфэрычным купалам з абходнай галерэяй у аснаваньні і круглай люкарнай у цэнтры. Сьцяна рытмічна падзеленая 4 арачнымі нішамі для скульптуры (не захавалася). Насупраць уваходнага праёму разьмешчаны алтар у выглядзе перагародкі з 4-калённым іанічна-дарычным порцікам на высокім пастамэнце і шырокай арачнай нішай у тоўшчы сьцяны. Пры галоўным уваходзе вінтавая лесьвіца на абходную галерэю і ў склеп, які вырашаны ў выглядзе круглай залі з цэнтральным апорным слупамі і цыліндрычным перакрыцьцем зь люнэтамі. Па пэрымэтры сьцяны глыбокія лучковыя нішы-калюмбарыі.

Літаратура

• Кулагін А. Праваслаўныя храмы Беларусі: Энцыкл. даведнік. — Менск: Беларуская Энцыкляпэдыя, 2007.— 653 с.: іл. ISBN 978-985-11-0389-4.

Вонкавыя спасылкі

• Царква Сьвятога Мікалая, на сайце Праваслаўная архітэктура Беларусі (бел.)
• Царква Сьвятога Мікалая , Radzima.org
• Царква Сьвятога Мікалая  (рас.), Глёбус Беларусі