Чарнільны сьцяг

Чарнільны сьцяг (па-габрэйску: דֶּגֶל הַדְּיוֹ‬, Дэгель ГаДыё) — самаробны сьцяг Ізраілю, узьняты ў часе араба-ізраільскай вайны 1948 року ў гонар узяцьця Ум Рашрашу.

Момант узьняцьця сьцягу, на шосьце Абрагам Адан

Мінуўшчына

Скульптура Бэрнарда Рэдэра

5 сакавіка 1949 Ізраіль распачаў апэрацыю «Уўда», апошні ваенны манэўр вайны. 10 сакавіка Армія абароны Ізраілю дасягнула берагоў Чырвонага мора на захад ад Акабы і бяз бою заняла места Ум Рашраш на месцы біблійнага Элату. У апэрацыі бралі ўдзел брыгады «Нэгеў» і «Галані». Выявілася, што яны ня маюць з сабой ізраільскага сьцягу, тады жаўнеры зрабілі яго зь белай тканіны, намалявалі чарніламі дзьве паласы і прышылі Зорку Давіда, вырваную з мэдыцынскай аптэчкі. Узьняў «чарнільны» сьцяг камандзір 8-га батальёну «Нэгеву» Абрагам Адан^[1].

У Эйляце пастаўленая бронзавая скульптура ў гонар гэтай падзеі.