Юры Курненін

Юры Анатолевіч Курненін (14 чэрвеня 1954, Арэхава-Зуева, РСФСР — 30 ліпеня 2009, Менск, Беларусь) — беларускі футбаліст і трэнэр. Выступаў у некалькіх амплюа — крайні нападнік, левы паўабаронца і абаронца. Майстар спорту. Памёр 30 ліпеня 2009 году ў сьне. Пахаваны на Паўночных могілках у Менску.

Юры Курненін
Пэрсанальная інфармацыя
Нарадзіўся	14 чэрвеня 1954(1954-06-14) Арэхава-Зуева[d], Маскоўская вобласьць, РСФСР, СССР
Памёр	30 ліпеня 2009(2009-07-30)[1] (55 гадоў) Менск, Беларусь
Рост	171 см
Пазыцыя	паўабаронца
Клюбы
Гады	Клюб	Гульні (галы)¹
1971—1975	Дынама Масква	17 (2)
1976—1987	Дынама Менск	315 (26)
Трэнэрскія клюбы
1991—1992	Дынама Берасьце
1994	Югра Ніжнявартаўск[d]
1999—2000	Дынама Менск
2006—2009	Беларусь (да 21)

Кар’ера гульца

Выхаванец футбольнай школы «Сьцяг працы». З 1972 выступаў за маскавіцкае «Дынама». У 1976 перайшоў у менскае «Дынама», дзе выступаў да завяршэньня кар’еры ў 1987 годзе. У 1982 годзе ў складзе «Дынама» стаў чэмпіёнам СССР. У тым сэзоне ў хатнім матчы супраць «Кайрату» ў кастрычніка адзначыўся хет-трыкам, зафіксаваўшы канчатковыя лічбы 3:2. Пазьней, у 1983 годзе, стаў аўтарам першага гола беларускіх клюбаў у эўракубках, улучыўшы мяч у браму швайцарскага «Грасгопэра». Быў капітанам менскай каманды ў 1983—1984 гадах.

Тройчы (1982, 1983, 1984) трапляў у сьпіс 33 найлепшых футбалістаў СССР.

Кар’ера трэнэра

У 1983 годзе скончыў БДІФК. З 1989 году перайшоў на трэнэрскую працу. Ачольваў віцебскі КІМ, берасьцейскае «Дынама». Апошняе прывёў да бронзавых мэдалёў чэмпіянату Беларусі 1992 году. Пазьней працаваў у расейскім «Саматлоры», у 1996 годзе быў галоўным трэнэрам нацыянальнай зборнай Сырыі.

У 1999 годзе вярнуўся ў Беларусь, дзе трэнаваў менскае «Дынама» і салігорскі «Шахцёр». У 2003 годзе ўвайшоў у трэнэрскі штаб зборнай Беларусі, дзе дапамагаў свайму былому таварышу па «Дынама» Анатолю Байдачнаму. У лютым 2006 году ачоліў моладзевую зборную Беларусі. Вывеў яе ў фінальны этап моладзевага чэмпіянату Эўропы 2009 году.