MathML

MathML (па-ангельску, скарот ад Mathematical Markup Language) — матэматычная мова натаваньня (markup), якая базуецца на XML і распрацаваная для напісаньня матэматычных сымбаляў і формулаў, асабліва ў інтэрнэце.

Стандарт MathML зьяўляецца рэкамэндацыяй працоўнай групы W3C. Першая вэрсія стандарту была апублікаваная ў ліпені 1999 году. У лютым 2001 году зьявілася вэрсія 2.0 спэцыфікацыяў, а ў кастрычніку 2003 году выйшла другая рэдакцыя вэрсіі 2.0, якая ёсьць канчатковай вэрсіяй стандарту.

У адрозьненьне ад папулярнага сярод матэматыкаў сынтаксысу TeX, MathML прызначаны ня толькі для апісаньня выгляду формулы (прэзэнтацыі), але і для апісаньня сэнсу (сэмантыкі) матэматычнага выразу. З гэтай прычыны сынтаксыс выглядае досыць «многаслоўным», і ўручную напісаньне формулаў у фармаце MathML — занятак адносна складаны і нязручны. Для гэтых мэтаў існуе цэлы шэраг праграмаў і ўтылітаў. Таксама ёсьць праграмы, якія канвэртуюць TeX файлы ў MathML і наадварот.

На 2005 год сярод вэб-браўзэраў падтрымку для MathML забясьпечваюць толькі найноўшыя вэрсіі браўзэраў Mozilla і Netscape. Некаторыя іншыя браўзэры маюць падтрымку праз адмысловыя плагіны. Напрыклад, Internet Explorer можа паказваць формулы ў MathML з дапамогай плагіну MathPlayer.

MathML таксама падтрымваецца апошнімі вэрсіямі офісных пакетаў Microsoft Word і OpenOffice.org.

Сынтаксыс

Некаторыя спэцыялісты крытыкуюць MathML за занадта «разьдзьмуты» сынтаксыс. Напрыклад, гэты выраз у сынтаксысу TeX/LaTeX:

x = \frac{-b \pm \sqrt{b^2 - 4ac}}{2a}

які адпавядае гэтай формуле:

${\displaystyle x={\frac {-b\pm {\sqrt {b^{2}-4ac}}}{2a}}}$

У MathML выглядае наступным чынам:

<mrow>
  <mi>x</mi>
  <mo>=</mo>
  <mfrac>
    <mrow>
      <mrow>
        <mo>-</mo>
        <mi>b</mi>
      </mrow>
      <mo>±</mo>
      <msqrt>
        <mrow>
          <msup>
            <mi>b</mi>
            <mn>2</mn>
          </msup>
          <mo>-</mo>
          <mrow>
            <mn>4</mn>
            <mo>⁢</mo>
            <mi>a</mi>
            <mo>⁢</mo>
            <mi>c</mi>
          </mrow>
        </mrow>
      </msqrt>
    </mrow>
    <mrow>
      <mn>2</mn>
      <mo>⁢</mo>
      <mi>a</mi>
    </mrow>
  </mfrac>
</mrow>

З другога боку, XML-фармат MathML дае магчымасьць хуткай інтэрпрэтацыі і рэндэрынгу формулаў.

Вонкавыя спасылкі

• W3C Math Home — Афіцыйная старонка MathML (па-ангельску)
• Mathematical Markup Language (MathML™) 1.01 Specification — Спэцыфікацыі, вэрсія 1.01
• MathPlayer — адпаведны плагін для Internet Explorer